東隧瘋狂加價，全港犯眾憎！繼長毛發動隧道抗議之後，紅隧即時狂塞排長龍，到星期二開工之日，隨時交通大癱瘓！
東隧背後係中資財團，魚肉市民，殘害經濟！北京中央人民政府胡錦濤，又話「以民為本」，佢名下嘅國家資本，就以「盲」為本，兼瘋狂搶掠唔使本！
東隧話合約規定，要保障最低利潤；笑話！合約？乜嘢合約？乜佢哋冇聽喬曉陽話，為確保如期選到新特首呢個「大道理」，其他「一切道理」都唔使理咩？同一邏輯，即係依普通法，就係合約，但最高釋法權，在中央人民政府，「以民為本」係中南海最高指示，凌駕在一切合約之上，因此，曾蔭權有權代民請命，就東隧狂加價所引發嘅社會危機，向北京提請釋法，睇吓係「以民為本」大，定係港英殘留嘅「普通法」嘅所謂英式「合約精神」大？
提請人大常委釋法，解釋「以民為本」，維護香港經濟繁榮及社會安定，咁係極其必要！否則東隧睇死你全港司機，排排吓長龍，排足兩粒鐘，超過營運成本「臨界線」，就會死死氣就範，行番東隧嘞。
行得兩行，咁佢一聲「合約精神」，話賺唔夠，又輪到紅隧私家車加到一程六十蚊咯喎！嗰陣時又輪到東隧排長龍？你當全港市民係儍㗎？
以民為本，釋法唔使本，強烈要求胡錦濤、王振民、喬曉陽，就東隧危機再次釋法！
傳真︰2623-9278
電郵︰[email protected]