一套《大長今》掀起追電視劇熱，今晚有套韓國收視更高嘅《醫道》上畫，極有可能將電視風推上更高一層樓。乜話？晚晚要加班睇唔切？AV場最新返咗隻內置TVTuner嘅流動式DVD機──Tini-LiteTHD-9080，雖然國貨出品，但就係少見直插式天線插口機種，睇電視畫面包清包靚之餘，8"大芒再加模擬器打機功能，國產實惠價$2,180，絕對係8"同類機嘅入貨新低價。
記者：朱崇德
攝影：陳盛臣
ImageGirl：Yuki
內置電視功能嘅流動式DVD機沉寂一時，近排好似又Hit番起，唔同牌子出完一部又一部；問啲人出機心態，一則放喺車做流動影院兼睇電視，不過近來重多咗班長時間開夜客，不論工廠、寫字樓、看更，甚至放喺睡房做「部屋影院」嘅住家人士，都會搵呢類大寸數流動式DVD機當電視睇，一來細寸數電視機𠵱家已買少見少，而且呢類機收得埋唔阻地方、睇碟睇電視又直接方便，好適合香港家居環境。
天線直入 包清包靚
好多人認為伸縮式天線，係呢類內置TV功能嘅流動式DVD機唯一出路；不過接收能力受環境所限，一則要地勢高、二則要環境開揚，先叫冇咁多雪花，實在睇得好辛苦，但由於近年用家的要求轉變，所以最新返嘅Tini-LiteTHD-9080就加入了天線插口功能，論清晰程度真係同屋企部電視差唔多，據知重有啲流動汽車客搵呢類機，事關只須加裝汽車專用嘅接收天線增強器，就有如屋企睇電視效果，勁正！
8"大芒 仿Notebook
機身使用銀黑色設計，感覺幾有NotebookFeel；最搶眼當然係佢個8"大芒，畫面實淨之餘，多角度觀賞都唔會話有「暗咗」感覺，基本可以話冇投訴，加上$2,180呢個價錢，好多齋Play冇電視功能機種都要呢個價，感覺份外抵玩！
DVD機功能都係玩齊大路功能，DVD、SVCD、VCD、MP3CD等，都可以直讀直播，而且國產專長嘅「花碟」強讀功能，亦都係一脈相傳，𠵱家時興自燒影像DVD，都可以輕鬆玩到。
送遊戲機手掣
不過講到最鬼馬嘅，係竟然發現跟機送上兩個USB遊戲機手掣！手感都唔錯㗎，不過搵勻全機Function都唔見有Game打，後來得知原來THD-9080重有一個隱藏讀Game碟功能，可對應NES任天堂模擬器光碟！問店員就話跟機一定冇遊戲光碟送喇！國產機真係永遠有啲估唔到嘅附加功能。
查詢電話：23980280（華仁會）
地址：旺角花園街75-77號花園商業大廈5、6樓