今日對版之圍港熱話a
身為精明消費者，當然要買盡着數嘢、掃盡減價貨！九展現正舉行「新一代家居博覽」，識得第一日去買平家具、電器，重識晨咁早去排隊抽獎攞獎品，以為自己好鬼醒？錯喇！點計都唔及得嬌姐、Candy呢對老嫩師奶組合咁精叻，因為佢哋識得留前鬥後，最後一日重點出擊買Display貨攞盡着數，跟住佢哋嘅攻略掃平貨，分分鐘慳成幾千蚊㗎！
記者：馬慶武、楊一凡
攝影：伍慶泉、梁細權
第六屆新一代家居博覽
日期：4月29日至5月2日
時間：11:00am-7:00pm
地點：九龍灣國際展貿中心
交通：九龍灣地鐵站恒生中心乘搭免費穿梭巴士
入場費：免費
嬌姐老薑貼士：瞄準最後一小時
薑愈老愈辣，嬌姐係經驗豐富的師奶，上年都有嚟掃貨，今年做好準備更加得心應手。講到最後階段掃貨，佢就話最緊要夾啱時間，因為有啲攤位一踏入最後一日就會開始散貨，有啲就會等到最後階段，睇啱邊種貨剩番最多先至定出激減價格，總之愈接近尾聲就愈減得平。嬌姐的經驗之談：「要留意時間，有啲攤位要到最後時段，即係五、六點先開始賣Display貨，你記住要喺當日問定啲店員，差唔多時間就要嚟排頭位喇！」
精明師奶Candy：提早巡場無執輸
後生師奶Candy對掃平貨都有獨到見解：記住提早鎖定目標！好似今次Candy想買梳化，佢就一早嚟睇定：「好似馬仙尼的梳化，大多數Display貨都會以會場價再七折發售，其實你可以一早來留定，但未到最後一日都唔知件貨會唔會好殘！最緊要係最後一日早少少嚟驗貨，睇啱即買，免得執輸。」
Display貨4日跌至五折
喺家居博覽買嘢，會場價已經平過街價，喺最後一日，各大攤位都希望盡銷手頭上嘅貨品，就更加會減價促銷，當中包括一大堆Display貨。雖然話係Display貨，但其實每件貨品都只係擺咗喺會場4日，新簇程度拍得住全新貨。最低價錢就係會場價五折，而且種類齊全，有齊家具、電器、精緻家品等大熱之選，重提供埋送貨服務。
Display貨推介
最終日激筍貨
彩色咕𠱸五折
會場價：$100
散貨價：$50
（Hall2 SimpleLiving攤位：1-311-14）
$10以下必掃新貨
唔鍾意Display貨？不妨向超平價新貨埋手，呢啲平貨全部$10唔使，重平過喺十蚊店買，但質素就好好多。除咗有平到$2一件嘅花樽擺設同埋家居設計雜誌外，好似Spontex嘅膠手套、地拖紙呢啲日用品，買滿$100即有六折，入定貨包冇後悔！
跟住師奶黨狂掃
