立法會議員「長毛」梁國雄次次遊行示威都同警察對着幹，搞到唔少差佬都唔係咁鍾意佢。不過凡事都有例外嘅，長毛噚日同八方講，佢最近為咗反對東隧瘋狂加價搞咗好多次抗爭，雖然又搞到俾人拉，但點知一上到差館，竟然有唔少警察叔叔私底下同佢講，心裏面其實都好支持佢，皆因東隧今次亂咁加價真係好鬼過份。不過職責所在，警察點都要維持秩序嘅。
連日嚟咁多人出聲都阻止唔到東隧加價，長毛睇嚟都有啲灰心。佢講明一定要夠人多，先會搞多次行動。佢重諗緊搵日call齊班司機大佬，齊齊走去東隧入口堅持畀舊收費，等東隧職員趕佢哋走，只要夠多車，一樣可以癱瘓東隧。長毛話明人數唔多就唔想搞，佢咁講法，唔想東隧加價嘅司機識做啦！
傳真︰2623-9278
電郵︰[email protected]