理想家居︰足球場搬上枱食飯零舍開胃

好多男仔都鍾意玩Figure，睇波儲球星公仔嘅都唔少，但若瘋狂到以大嗱嗱3千蚊，專門將張4人飯桌變成立體足球場，將啲球員排到好似對壘咁，日日重可以對住嚟食飯，咁搞鬼，你又見過未？為咗襯埋一Set，牆上又裝多個同款Figure櫃用來Show收藏品，咁揼本，無非都係想將飯廳變成足球主題屋，今日就公諸同好！

記者：梁彩燕　攝影：陳智良
設計公司：i-designFurnitureCo.（27688933）

年輕人Calvin同Erica喜歡模仿日本部屋嘅Design，客廳的家具較多採用圓角設計，亦加入咗唔少塑膠元素，掛塊啡黃色幾何圖案窗簾布，再配一面很Raw的泥牆，成間屋感覺當堂變得又Young又潮。Erica話：「我哋兩個又鍾意儲公仔儲Figure，所以飾櫃、層架比較多，方便收藏又可以Show出嚟欣賞！」

設計師：Tracie
地區：元朗YohoTown
面積：900呎
間隔：3房兩廳
裝修費：$90,000
家具費：$50,000

足球場ShowFigure

男仔十居八九都鍾意睇波，齋睇球賽就真係幾悶，Calvin就最鍾意儲Figure，曼聯同巴西隊更是至愛，幾十個球員Figure放喺飾櫃實在普通咗啲，竟然諗到將成個球場搬上枱，鋪埋草地不特止，為求提高逼真度，重加埋百事、Vodafone等廣告牌，落場球員簡東拿、朗拿度亦當然唔少得，砌到好似踢緊比賽咁款，（退咗休或轉咗會嘅球員如馬勒當拿咁，就要拍埋場邊冇得落場。）雖然唔算好有英姿，但話晒都人強馬壯，個個造型趣致又搞鬼，兼可經常換場景，日日對住心愛的Figure食飯，絕對係創意之作！

■訂做足球枱約$3,000。

■飾櫃則需約$5,000。

■飾櫃及餐枱均為木製品，喺表面焗咗層厚厚的光油，做出塑膠感。

■講足球，點可少足球小將份兒？

■你鏟我我鏟你，應該判罰咩呀？

趟門偷位至實際

香港地寸金尺土，既然有地方，裝多幾個櫃至實際，但空間利用實質亦為一門學問，唔係話一味量多就得，家陣亦好興將啲櫃入牆或裝鏡，但Calvin屋企反而多從小處着手，衣櫃延伸至天花，但放得唔多唔密，又以趟門代替傳統拉掩門，或以偷位形式為大櫃增加變化，美觀實用兼備。

■趟櫃同雜誌架合體，做到盡量慳位。

■儲物櫃橫趟式設計，慳位。

■假天花係最佳的掩眼法，一來可將橫樑隱藏，同時變成儲物格。

■不忘偷位方便放雜誌或瑣碎品。

睡房添Resort感

唔想太多牆，打通兩房最有效擴闊空間，Calvin同Erica異口同聲話睡房係休息嘅地方，做到好似Resort咁就最有Feel，首先睡床提高咗變地台，同時亦係儲物抽屜，衣櫃以趟門式設計，高至天花，儲物量夠豐富。Erica表示睡房同工作區特意不作明顯的分野，除咗以簾作分隔，兩者之間的衣櫃亦專登以相若質料及顏色發揮緩衝的作用，「咁睡房同工作嘅地方就唔會分開得咁突然喇。」

■睡房櫃多為木皮質料，髹上「特清油」，使質感較啞身，可Keep番原本個木色同Natural感。

■$1,500的現成貨，焗漆效果同一屋家具配合得恰到好處。

■特意提高地台，下為儲物櫃。

■以簾分隔睡房及工作區，唔會到處都係厚沓沓的牆。