呢排個股市升跌無常，無路可捉，想賺錢極不容易，但係證券經紀就幾好喎，每日成交少者有百零億，多者接近兩百億，經紀應該有肉食啦。
呢日參加一個教育網站啟用禮，碰到資深大經紀Ｈ，向佢講番幾句客套話：「呢排好肥啦，咁多成交，你一定做生意做到唔停手……」經紀Ｈ立即講：「閘住，你唔識就唔好擦我鞋，我哋其實係吊緊鹽水，想食肥肉呀，發夢就有。」左丁山唔信，要佢解釋。
經紀Ｈ話：「大部份成交都係對沖盤，與我哋啲散戶零售客無關，散戶根本絕晒迹，我手下幾個金牌經紀，以往日做三四千萬生意閒閒哋，𠵱家個個得番幾百萬；散戶輸得太勁，又睇唔通個市，好多人離咗場去養傷，我哋靠零售生意嘅，當然亦好傷。」
經紀Ｈ之言不知是否可信，於是打電話問一問零售經紀Ｓ，經紀Ｓ話：「係吖，散戶生意真係少咗好多；我哋做經紀正在捱粥水，如果唔係，我哋公司做乜鬼現在要兼營黃金外滙吖！」兩個經紀都係咁講，冇法子唔信，今日股市，乃係大莊、衍生工具天下，窩輪生意所佔比重，日益擴大，幫散戶買賣正股嘅證券行，自然得個捱字，最肥嘅就係窩輪發行人。
生意難做，不如提早退休？經紀Ｈ與左丁山出席教育網啟用禮，十分羨慕創辦人賓架Ｐ。呢位賓架年紀不大，一九八二年先至大學畢業，細佢師兄陳德霖幾歲，已經宣布退休，返大學讀教育碩士，利用佢在投資銀行界嘅經驗知識，成立一個網站，專為教育項目籌款。譬如你有一個教育計劃，寫好計劃書，交畀網站嘅審批委員會（上市委員會）審閱，委員會認為可行，就將計劃書擺上網（上市掛牌），等啲有錢善心人（譬如經紀Ｈ）睇到，自願捐錢（認購新股），於是達成籌款（集資）目的。呢個計劃甚新穎，至於行唔行得通，就要睇新股（新教育項目）是否有水平咯。