我𡃁仔時有個花名叫做「四季腳」，四季腳者，四季皆經常會受傷嘅一對腳也。由出世開始，上身重如航空母艦，偏偏生成一對同香港小姐咁上下粗幼嘅腳瓜瓤，上重下輕嘅關係，於是失重心仆親、跌親、拗柴、炒芥蘭，三日一小劑，五日一大鑊。
小學階段開始發現兩隻腳趾公隔一排就會痛，唔係外邊痛，係入面痛出嚟，媽媽話我遺傳有谷家嘅優良傳統——「掙甲」。掙甲者，趾甲唔止會生長，重會橫向兩邊肉裏掙入去，如果唔定期清理，腳甲會一直陷入肉裏，像小尖刀般篤住篤住，很快便會演變成發炎。細個嗰陣，媽媽會用小剪刀細心地替我清理，每次都儼如一次小手術，雖然痛到甩肺，但媽媽手勢好加上大量愛心，反而當係一次定期嘅溫馨約會。
眨吓眼已長到牛屎龜咁大，媽媽眼力亦不如前，惟有勞煩修甲師傅代勞，在香港有一位手勢極佳、做慣做熟的修甲師傅，平均每三個禮拜便相約見一次面，但若然是身處外地工作，那心裏便有罣礙，怕掙甲一旦發作便不知如何是好，更怕碰上不衞生的修甲師傅，刀光劍影，極易染上傳染病。
原來，這個世上有一種專科醫生叫「足醫」，專門研究由腳趾尖到膝頭哥，據說處理掙甲非常拿手，曙光一線，決定把這雙陪伴了自己幾十年的掙甲徹底處理掉。