許冠文前晚喺紅館搞嘅第一場棟篤笑，口碑好壞參半，馮仁昭就覺得幾好笑，不過現場都有觀眾瞓着咗。成個騷嘅話題多數都係講政治同民生，笑吓啲高官、講吓啲爛滾男人、同埋大陸多假嘢等等。
許冠文揶揄何偉途被指喺內地尋歡，又笑吓黃宜弘舉中指，講吓反日潮呢個話題，佢重鬧美國好霸道，搭飛機有指甲鉗都唔放過，佢話：「我有外國返嚟嘅朋友笑我哋重用倔頭筷子，佢哋就用刀叉，我話因為我哋中國人好和平，唔會用殺人武器對住親人，日本人就用尖頭筷子，所以發動第二次世界大戰，霸我哋釣魚台島，個島係邊個唔係問題，到時睇吓邊個指甲鉗多，個島畀佢哋釣住魚先，第時剪晒佢哋啲指甲。」全場即時起哄歡呼。
後來許冠文又講到𠵱家啲女人應該點樣揀男人時，就話𠵱家啲有錢男人個個都光頭，籮柚重皺晒皮，俗稱契爺，咁啱個鏡頭影住霍震寰夫婦，霍生係咁笑，霍太就指住老公猛話講緊佢，乜霍震寰有好多契女咩？
楊千嬅噚日喺旺角搞簽名會，原本申請一千個籌，但警方驚混亂最後只批咗五百個，而現場就有成二千巿民圍觀。拖住隻假馬出場嘅千嬅，幫隻馬改名做「金牌大師」，千嬅話隻馬拍完唱片封套之後，攞咗佢返屋企擺，但啲朋友就當咗佢屋企係旅遊觀光點，不時走去影相。
王賢誌喺美麗華酒店舉行嘅二手衫慈善熱賣，明晚十點就會結束，為將所有二手衫全部賣出，王賢誌決定由今日開始免收十蚊入場費，兼且將啲衫減低到三至四折發售，好似池珍熙着過嗰件LV衫原本賣五千二，𠵱家只係賣二千九百幾，真係手快有手慢冇。
蕭正楠噚日喺北京返香港，佢喺機場話：「我去咗北京錄音同拍劇，呢套劇會去東京拍外景，遲啲會喺中央電視台播映，雖然呢排中日關係緊張，但我相信去日本拍外景唔會有乜問題，因為去日本拍外景會得到當地政府協助，其實內地都開始降溫，早兩日我喺北京時，我租用嘅中國移動電話都有發出短訊勸喻市民五一勞動節唔好去遊行。」
馬浚偉噚日喺沙田嘅文化博物館出席活動，佢話自己一直對中國歷史好有興趣，一得閒就會自修中國歷史，原本佢重想將屋企裝修得比較有中國氣息，但係就俾屋企人反對，佢話將來嘅女朋友都要對中國歷史有啲認識，所以唔打算娶鬼妹仔。
薛家燕（好姨）噚日喺銅鑼灣出席無綫節目《美味大競菜》宣傳，佢話稍後會返內地拍攝節目《家燕名廚樂》，好姨話：「我會請好多名廚教我煮嘢食，到時我都會親手示範，其實我未結婚前，都曾經學過一年烹飪，我都好鍾意煮嘢食㗎。」
