連月來令全港市民追到氣咳的人氣韓劇《大長今》，終於在昨晚播出大結局，對於長今與閔大人有情人終成眷屬，陳慧琳、容祖兒和余安安等一眾長今迷均感滿意；其中中宗一手促成長今跟閔大人的好事最令祖兒和趙雅芝印象深刻，而閔大人求中宗再封長今做主治醫官一幕則最令陳慧琳感動。
在昨晚畫上句號的韓劇《大長今》中，李英愛飾演的長今，跟池珍熙飾演的閔政浩有情人終成眷屬，更產下一女，一家三口過着幸福快樂的生活。對於這個大團圓結局，圈中不少《大》劇fans感到非常滿意。
陳慧琳（Kelly）昨透過經理人鍾珍說：「我好滿意個結局，而最令我感動嗰一幕，係閔大人知道中宗想收長今入後宮之後，求中宗再封長今做主治醫官，自己願意棄甲歸田以平朝中大臣之憤。閔大人尊重長今嘅意願，一啲都唔自私，肯為自己所愛嘅人犧牲，真係好令人感動。」
而早前小長今與鄭尚宮訪港時送給Kelly的一套名貴皇后服飾，Kelly已割愛將它送到香港杜莎夫人蠟像館展覽，鍾珍說：「其實佢哋送咗一套皇后服同宮女服畀Kelly，Kelly覺得件衫咁靚，擺埋一邊會好嘥，所以決定將件衫送去蠟像館，着喺Kelly蠟像身上，等多啲市民同遊客都可以欣賞。」
容祖兒則覺得長今跟閔大人重遇最感人，她說：「長今救過咁多人，好應該好人有好報，呢個係真人真事，大團圓結局都係意料中事。講到最令我深刻一幕，係中宗臨死前為咗保護同成全長今，秘密搵人送佢去閔大人流放嘅地方，等佢哋有情人終成眷屬；而長今同閔大人經歷咁多波折後終於見番面嘅場面，都好感人。」
余安安就欣賞整體水準很高，是近年佳作，她說：「其實我都好多年冇追劇集睇啦，但我一早追晒《大長今》，個結局我好滿意。我覺得《大長今》係近年好高水準嘅劇集，有好多幕都好感人，唔單止題材正面，喺感情方面都交代得好好，唔係單純一部講飲講食嘅劇集，好似中宗身為一國之君都肯讓愛，呢方面更加令人信服，而且，長今知道中宗對佢嘅愛，佢唔係一個無情嘅人。」
趙雅芝亦有追睇《大長今》，她說：「長今嘅成功同成就，除咗係佢本身努力之外，佢身邊亦都有好多人造就佢，好似中宗同閔大人咁，部劇happyending，都幾好吖。而中宗秘密送走長今，等佢同閔大人見面呢一幕，都幾感人。」女生宿舍成員梁靖琪（Toby）則說：「我好鍾意長今同閔大人可以組織家庭，大團圓結局，好滿意呢個安排。至於最感人嗰幕，係講長今一家三口喺海邊過平靜生活，真係好touching。如果家庭同名利任擇其一，我一定會揀前者。」
採訪：戴彩煥、朱倬誼、比華利、梁錦貞 攝影：陳偉權
