陳奕迅（Eason）前晚在馬鞍山演出戶外騷，演繹了新歌《爛》，Eason指作曲人安排很多高音部份，似考他的唱功，Eason笑說：「要閹咗先唱得，以前好多男高音係閹咗。」
陳奕迅前晚在馬鞍山白石俱樂部演出戶外音樂會，他的太太徐濠縈、謝霆鋒、劉浩龍、吳浩康、余文樂及鄭融等都有往捧場。
Eason演繹了不少新歌，包括歌曲《爛》，Eason說：「唱唱吓唔知作曲人想考我，咁高音，之後要閹咗先唱得，以前好多男高音係閹咗，唔講啦，下面『撩』（催促）我。」Eason又演唱《不良嗜好》，他手夾香煙狀物品，然後拋掉，事後解釋是在日本購買的戒煙用品。
其間台下歌迷大叫Eason除衫，Eason說：「我唔除啦，做老竇成熟咗，張震嶽六月十七日嚟香港，佢可能會除。」又有男歌迷叫Eason除褲，Eason說：「男人老狗咁想睇人除褲，我除你都要除，男女平等，一齊除吖笨。」
問Eason是否已戒煙，他說：「呢個階段未戒成，革命尚未進行，我喺屋企唔食煙。政府叫人戒煙愈來愈嚴厲，我睇到啲海報都覺得恐怖，稍後室內全面禁煙，唔食煙嘅人冇義務吸二手煙。」
本月二十日Eason會出新碟，還有兩首歌未錄好，Eason說：「我希望新碟有個主題，人愈嚟愈大愈怕死，愈怕同人講真話，我覺得用英文講嘢直接過中文。」
前來睇騷的徐濠縈產後消瘦不少，她說：「我最初餵人奶同湊女，半年都收咗身，𠵱家唔使再瘦，瘦咗三十磅，我都想做番啲同時裝有關嘅嘢。」下周日是母親節，徐濠縈說：「佢（指女兒）咁細個，等佢第二時畫張卡畀我都開心。」
採訪：李珮洳 攝影：仇志德
