噚日有報道話鄭秀文（Sammi）患癌，其實呢啲只係誤傳，佢患嘅係心理病，而且唔係單憑藥物就可以好番，因為Sammi到𠵱家重有好多嘢未睇得開。
聽講呢排成龍、梁家輝同埋關錦鵬，喺上海同Sammi合作拍《長恨歌》期間，已經發現佢唔多妥，佢哋出於關心，諗住介紹醫生幫Sammi，但可惜Sammi冇乜反應。
聽呢組戲嘅人講，Sammi喺上海時情緒好低落，佢試過困喺房入面十幾日，乜人都唔見，工又唔肯開，每日只係靠攝紙仔同外面嘅人溝通，就算經理人或近身助手都一樣唔見。
關錦鵬部《長》片畀佢拖一拖，搞到超時超支都未拍完，而呢組戲嘅幕後人員，對Sammi亦頗有怨言，大家谷住一肚火，特別係美指張叔平，如果唔係畀面導演，可能早就劈炮。
馮仁昭打畀Sammi經理人郭啟華，佢又例牌否認話：「Sammi冇事，早排佢增肥，係為拍呢部戲，𠵱家又要減磅，拍少女戲份，所以佢要停幾日唔開得工住。」
梁洛施（Isabella）噚日出席護膚品活動，即場表演小魔術。對於劉美君批評Twins咬字不清，兼且有好多歌手只賣弄可愛嘅外表，Isabella就話：「劉美君始終都係前輩，一定要聽，但係我都知Twins佢哋做每件事都好努力，我覺得要做好本份，懶就梗係唔應該。」
奧運「蛙后」羅雪娟雖然喺七月要應付喺加拿大舉行嘅世界游泳錦標賽，但佢噚日就低調嚟咗香港，帶埋媽咪行百貨公司揀手袋，做母親節禮物。
羅雪娟之後又買咗西裝同皮鞋畀爹哋，同埋鬚刨畀游泳教練，而佢自己就挑選咗便服同護膚品，滿載而歸。
唐季禮上年二月俾內地嘅《青年時報》寫咗篇損毀名譽嘅文章，由於文章廣泛流傳，唐季禮於是告上內地法庭，噚日上海法院審結該宗名譽侵權案，唐季禮最終贏咗官司，法庭判《青年時報》賠償經濟損失十多萬元人民幣同精神損害安撫金五萬元，唐季禮話好滿意裁決。
廖碧兒噚日喺銅鑼灣出席手袋活動，大會安排咗化妝師喺佢胸口度畫蝴蝶圖案。廖碧兒話：「我𠵱家開始喺網上訂購外國時裝，屋企總共有過百個手袋，最貴嗰個係家人送嘅狗袋，成幾萬蚊，用嚟裝住隻狗出街，我隻狗真係幸福。」
