新世界中國（917）今年初供股，阿媽新世界發展（017）所佔權益扯到爆晒燈，新中重喺供股成本2.8元下，有得諗。
呢次新中以2供3比例，以每股2.8元供股，結果，阿媽新世界及一致人士，由原先揸住10.68億股（71.04%），扯到上供股後30.32億股（80.64%），爆晒燈。要咁睇，阿媽新世界呢次額外增持新中19.64億，成本價即供股價2.8元，以每調整0.1元計，新世界蝕1.96億元，咪話唔㩒計。再講，新中要維持25%公眾持股量，阿媽就要減持2.1億股出街，無理由咁蝕章喺2.8元成本價下減持啩？
又呢期中央繼續針對房地產過熱進行打壓，但最新措施所見，不過收起土儲唔賣，但呢個措施，壓止唔到樓市升勢之餘，反而因土地供應減少，重刺激樓市升勢，對擁有龐大土儲（1700萬平方米）嘅新中，更加有利。所以，照計數，新中一跌低過2.8元，就係博反彈時機。
康健（8138）宣布引入玩具大王蔡志明之後，搞到隻股㷫烚烚，再有調整，可以兜底。又講兩點，第一，新任衛生福利及食物局局長周一嶽上場後，從調整公共醫療收費，乃至贊成增收來港生BB自由人收費，思維所見，似係想致力改善公共醫療龐大開支負擔。所謂此消彼長，特區政策落實，會對私營醫務所，特別係康健呢類連鎖式醫療業，帶嚟唔錯商機。第二，玩具大王前排投資位元堂（897）時，曾透露喺美國亦有私人投資醫療保健業，呢期拍住康健，唔係無厘頭。寄望透過康健平台，同曹貴子擦出火花，呢期兜底價，暫定10日線8.9仙水位。
錢雋