荷李活大導演列尼史葛（RidleyScott）繼《帝國驕雄》之後，再次拍攝大製作嘅史詩式武士電影《天國驕雄》，重搵嚟炙手可熱嘅靚仔男星奧蘭多布魯（OrlandoBloom）擔任主角，套戲今個星期四喺港、美同步上映，睇過試片嘅外國影評人都話套戲嘅戰鬥場面好浩大。
奧蘭多喺《天國驕雄》入面扮演喪失妻兒嘅鐵匠巴利安，跟隨生父返番耶路撒冷，積極練習劍術成為出色嘅騎士。佢唔止得到耶路撒冷國王博杜安五世重用，亦受由伊娃格蓮（EvaGreen）飾演嘅郡主茜貝拉雇垂青。被導演選中做浪漫英雄嘅奧蘭多極為興奮，佢話：「我終於達成好多男士夢寐以求嘅宏願成為武士，奪得美人歸，做個頂天立地真英雄。」
套片唔止有靚仔奧蘭多同靚女依娃格蓮演出，重有唔少演技派演員壓陣，包括飾演巴利安生父嘅里安納遜（LiamNeeson）同埋飾演耶路撒冷國王博杜安五世嘅愛德華羅頓（EdwardNorton）等，絕對人強馬壯。
講到幕後製作亦唔嘢少，負責《天》片嘅服裝指導整咗超過一萬五千件戲服，而武器專家亦造咗成千上萬唔同嘅武器。製作公司又請咗超過三百五十個嚟自不同國家嘅工人、動用超過六千噸建築材料重建十二世紀嘅耶路撒冷聖城。另外，導演獲得摩洛哥軍隊協助擔演騎兵之餘，重巧妙咁運用電腦特技，將二千名士兵變成為二十萬嘅軍團，令戰爭場面更加震撼。