餓咗咁多個星期碟，今個星期3區終於都威番次，連埋上面套《大長今》，臨星期尾嘅幾日間，就有成8套新片落場，情況都幾迫爆，當中大家可以特別留意隻《歌聲魅影》，被譽為靚聲天碟，必買！
《歌聲魅影》改編自同名經典歌劇，雖則佢今次係拍成電影，但模式就照足原著以「歌劇」演出，所以台詞由頭唱到尾，要求聲效當然係高好多啦！今次3區版使用現時DVDVideo最高階的dts96KHz/24bit/6聲道（就是DVDAudio都只係去到192KHz/24bit/2道），好多碟舖做Demo試片，都係以一開場掛起水晶燈、畫面由黑轉白一段，經典嘅主題歌再加震撼場面，好多發燒碟迷都話聲效超靚，真係有種連毛髮都豎起嘅感覺！至於冇靚影院組合嘅用家都唔使太傷心，DVD內另預備有普通dts5.1聲效輸出，絕對係各類玩家都照顧到！
記者：朱崇德