電視劇收視強，好多時會連帶VCD同期推出！但好似今次《大長今》，VCD版提前出齊，再加DVD精美BoxSet版同電視大結局同日推出，真係幾少見吓！今次《大長今瑰麗珍藏版DVD》，力Sell原裝正版絕無刪剪！DVD靚畫質，睇慣電視版更覺佢啲色「標」到漏出嚟！韓、粵雙語選擇，27碟套裝約售$1,100，計起都係$40隻，都算幾抵買，等唔切今晚8:30《大長今》結局篇，不如嚟個煲碟優先場！
記者：朱崇德 攝影：陳盛臣
《大長今》可以話將韓劇熱潮推到近年頂峯！最高收視43點/觀眾人數283萬（收視率95%），即係平均每2.4個香港人，就有1人夜晚趕返屋企「哺」住電視機嚟睇！今晚個半鐘《大長今》結局篇，有網上博彩公司重開出「45點」盤口，看能否打破之前《男親女愛》44點嘅最高紀錄；有時心裏面慨歎一句，求其搵個香港人問吓長今生平，真係隨時重耳熟能詳過華佗嘅故事；華佗係咪中國人嚟㗎？端午節又係咪韓國文化遺產呀？
專人配音 粵語版
《大長今》可以話由「無記」配音給予最大生命！長今嘅勵志句語、今英如詩般的排句台詞，重有姜德久比韓版更生鬼抵死嘅配音（唔知點解佢每次出場就會諗起叮噹！）老實講句！落到碟舖大家劈頭第一句就係問是否「無記」配音，此亦因各方小道消息混淆所致；經小記以現貨測試及鐳射代理證實，今次DVD版同早前推出的VCD版一樣，都係特別另搵專人配音，雖然並非「無記」版，但論質素亦相當唔錯，DOLBYDIGITAL雙聲道，音效實淨好多！更心水推介係韓語DD2.0版本，原汁原味之餘，背景聲效及配樂的細緻程度，更是電視版重未體驗過！
《大長今》電視節目時間表
《大長今》結局篇晚上08:30-10:00
《大長今》完全睇晚上10:00-11:00
靚畫質 顏色標
叫得瑰麗珍藏版！重要係DVD！畫質當然係有番咁上下；基本行640×480（4:3），解析度比平時大家睇開嘅電視劇高出近1倍；不過最「養眼」嘅係成套戲嘅色調，不論係皇宮內嘅亭台樓閣、原野莊家內的一草一木，還是各醫官內人嘅服飾，都可以見到極盡微細裝飾，如果套影院組合有番咁上下，真係連布料質感都可以「睇」到！另一感受深處，係DVD的顏色表現非常「標」嚟形容，其實傳統韓國民族服就已經係「鮮豔欲滴」，所以今次睇DVD版，感覺韓風味更濃。
原汁原味 54集
今次瑰麗珍藏版另一惹人注目處，就係「原裝正版絕無刪剪」；無記電視版連今晚嘅《大長今》結局篇共71集，至於DVD版就照足原版27隻DVD、54集（片長共54小時）！就刪剪問題求證於發行公司；雖然未能仔細指出多咗幾多分鐘，但54集原汁原味從未經後期製作改動，感覺是更一氣呵成！如果大家細心觀賞，可能間唔中重會發現有啲電視版冇見過的鏡頭，真係幾鬼馬！最後唯一美中不足處，就係Bonus部份今次完全欠奉，果然係「原汁原味」呢！
鐳射發行
查詢電話：23669633
