隔晚美股唔對路，港股開市前，人人估計今回有得震冇得瞓，結果上晝恒指跌過107點，到下晝收復失地，埋單跌唔夠半點。
中石油C輪3888：油價跌，中石油（857）亦跌，收4.675元，報銷0.10元。其他兩隻油股中海油（883）與中石化（386）命運相同。3大油股中，只有中石油有P輪，熱門貨有3972與4711，分別彈升19%與14%。做即市，好難搵錢，一開市即已上升，只有隔晚揸落嘅先至真正賺錢。
中石油C輪熱門貨3888，散13%。正股如果再跌些少，估計會有反彈，中石油到底係芬佬股，低位有承接，到時趁低買3888。隻輪9月下旬到期，輪價18.7仙，溢價6.7%，槓桿率25倍（有效10.6倍），引伸波幅22.8%。
中海油C輪4580：中石油係國指成份股，國指跌40點，中石油「帶挈」咗20點。中海油則係恒指成份股，由4.325元退到4.225元，「帶挈」恒指冇咗13點。
中海油C輪普遍槓桿率唔細，所以輪價跌勢都幾傷。正股如果再跌，搵啲C輪細注博反彈，正路之選係4580，下月初夠鐘，輪價17.5仙，溢價0.9%，槓桿率24.1倍（有效14.4倍），引伸波幅26.1%。
中石化C輪3862：中石化跌5仙，收3.05元。吼住低位博反彈，C輪3862可以諗吓。講到數據，則冇中石油C輪3888與中海油C輪4580咁靚。
章盛