何超儀前晚穿上一襲低胸迷你裙，頒獎給鄭中基、黃秋生、吳嘉龍和馮德倫四位型男，超儀大讚他們有內涵、幽默和可愛，正是其心目中的型男，但老公陳子聰才是型爆燈的男士。
何超儀前晚以嘉賓身份參加雜誌《Maxim》在中環一會所舉行的一周年紀念派對，並且頒獎給該雜誌選出的四位型男包括鄭中基、黃秋生、吳嘉龍和馮德倫。
何超儀對四人讚不絕口，她說：「秋生有才華同內涵；馮德倫就可愛，佢嘅酒渦同對眼好迷人；鄭中基幽默之餘，啲牙好靚；吳嘉龍夠靚仔，全部係我心目中嘅型男。」那超儀覺得老公陳子聰如何？她說：「呢個更加係爆燈之選啦。」
鄭中基表示讀書時期已經跟超儀認識，他說：「可能佢嘅高度啱啱望到我排牙咪讚啲牙囉。」至於被傳會跟Twins合作拍片，鄭中基否認有其事，但作為專業演員，他不會抗拒跟緋聞女友蔡卓妍合作。
馮德倫被記者問到有否被女朋友讚他的電眼及酒渦時，他對號入座說：「你哋唔好成日講Karen（莫文蔚）啦。」
秋生則否認曾指摘《阿嫂》女主角劉心悠，他連珠炮發地罵記者說：「𠵱家啲記者知識水平咁低，唔通叫佢哋返學校再讀過書咩？我屋企隔籬啲三姑六婆都識字，不如叫佢哋做記者喇。啲記者講得就講，作得就作。我討厭是非，討厭誤會，討厭傳媒。」對於曾志偉指秋生做宣傳，秋生說：「我唔知佢有冇講，我都好懷疑佢有冇講過，但我唔會問佢喇，如果個個講我都要打畀佢哋問，我咪好唔得閒？」
採訪：何永寧 攝影：陳慧安
