早前盛傳搭上按摩女郎嘅王敏德（Michael），經過多番澄清兼且要老婆馬詩慧出面，先至保住清白之身。噚日Michael就以健康爸爸形象，同三個仔女一齊去咗尖沙嘴宣傳新車Mazda5，雖然馬詩慧因為發燒而嚟唔到，但係佢一家人依然好溫馨，大會重送咗架二十萬嘅新車畀佢哋享受家庭樂，真係羨慕死人。
Michael最近有份參與MaggieQ演出嘅意大利電影《CountingHouse》，Michael個大女Kayla原來都有份演出，但係據Michael所講，電影公司當初只係睇中佢囡囡，最後先至帶挈埋佢！
Michael噚日話：「個女嘅戲份重多過我，但係佢拍到第三日就話畀我聽佢唔係咁鍾意拍戲，比較鍾意唱歌，我睇過佢演戲都做得幾好。」Michael話雖然只係做閒角，但係同個女合作就別有一番感受，佢重好贊成Kayla入娛樂圈，實行父女檔拍住上喎。
名模Rosemary同陳嘉容噚日去咗中環擔任「自然美Spa」嘅開幕嘉賓，兩個人包得密密實實，只係企喺浴缸邊影吓相，真係掃興。佢兩個都異口同聲話最鍾意浸Spa減壓，陳嘉容重誇張，佢話每次幫襯都會用四個鐘頭嚟做埋按摩同facial，不過只限女性幫佢按摩，男士免問喎。
王菲同男友李亞鵬喺上海合資嘅VIPROOM酒吧前晚試業，老友劉嘉玲都有捧場，一班人喺酒吧消遣，據知李亞鵬不停喺舞池招呼賓客，到大約十一點鐘，王菲同劉嘉玲入咗廂房，李亞鵬再上樓同王菲會合，兩個人喺房裏攬住好親熱；而嘉玲離開嗰陣重顯得有啲避忌㖭。
陳奕迅（Eason）嘅新歌《夕陽無限好》MV可算十分大陣仗，事關唱片公司使咗五位數字搞動畫效果，MV由「e頭公仔」擔任主角，Eason話希望呢個公仔能夠成為佢嘅標記，佢重考慮推出一系列嘅公仔、T恤同帽，認真有生意頭腦。
官恩娜噚日喺清水灣舊電視城拍攝《奇幻潮》，飾演一個四十幾歲有紋身嘅女人，所以左手貼咗假紋身。不過官恩娜喺片場度竟然講錯說話，佢話：「劇入面話我想洗甩紋身，不斷抓傷自己嘅皮膚，但係我講咗『真係唔見血唔安樂』。工作人員猛話我講錯嘢，所以為求心安，我都係上香拜神。」
