政府噚日喺禮賓府搞五一勞動節酒會，請晒班勞工界同僱主代表參加，煲呔滿場飛，周圍同人握手。工聯會鄺志堅估計，呢度冇一百票都有幾十票。
鄺大狀前日喺立法會炮轟煲呔，放假返大陸都要攬住署理特首個位，唔放畀唐唐，有違憲制慣例，煲呔噚日就特登同鄺大狀握手，笑騎騎話一定會書面答覆。鄺大狀同八方講，佢要書面答佢，其實係要錫住煲呔，驚佢講多錯多喎！
另方面，民主派噚日開飯盒會傾李永達選特首，不過反應真係好冷淡，等嚟等去都冇乜人開會，結果冇乜嘢傾到，大嚿陳偉業就話，李永達唔應該講咁多政綱，應該全力炮轟煲呔要為官商勾結、貧富懸殊、破產自殺嘅問題負責！
又煲呔可能好難搵人，噚日宣布再委王䓪鳴做教統會主席兩年。
傳真︰2623-9278
電郵︰[email protected]