現年四十二歲嘅荷李活巨星湯告魯斯（TomCruise），最近俾人發現佢同二十六歲嘅青春女星姬蒂荷姆絲（KatieHolmes）拍拖，轟動全球。但估唔到性感惹火嘅姬蒂，聲稱自己係處女，重曾經自爆細細個已經發夢同靚佬湯結婚，佢都諗唔到自己嘅夢中情人真係主動去識佢，真係開心到痹！
據英國《太陽報》報道，靚佬湯嘅出爐新歡姬蒂荷姆絲同人講話自己仍然係處女，重話會喺結婚嗰日先同男人行房。雖然佢好似BritneySpears當年咁扮晒純情，但佢曾經同電影《美國處男》男星基斯格連（ChrisKlein）拍拖五年，之後又俾人見過佢同佐斯哈尼特（JoshHartnett）來往甚密，加上佢又喺電影《驚魂眼》入面有露點演出，真係好難令人相信佢重係完璧喎。
姬蒂重話佢同好多女仔一樣，細細個時都會發啲關於結婚嘅春夢，佢就成日夢見自己同靚佬湯結婚。至於靚佬湯亦大方表示係佢主動搵人聯絡姬蒂，之後重大讚姬蒂為人好真㖭，外界都話姬蒂真係好運過中頭獎啦。
此外，靚佬湯近日同姬蒂去意大利羅馬不但住喺著名Hassler酒店二萬八千蚊港紙一晚嘅總統套房，又喺房內插滿玫瑰花，營造浪漫氣氛。為咗令姬蒂開心，靚佬湯重訂咗四十件GiorgioArmani嘅晚裝畀姬蒂揀嚟着，齊齊出席電影頒獎禮，真係體貼到暈，難怪姬蒂喺羅馬全程眉飛色舞啦！