中原銳意進軍報業，據知已喺都市日報，挖咗個高層組班，投資億五，出一份日報。
蘭西噚日聯絡到身處四川，幫苗圃行動籌款嘅中原集團主席施永青，佢承認搞緊，見過吓啲人，但強調「十畫只得兩三撇」，而且重未同合夥人王文彥傾過。
老施指班底未齊、資金與方向未定，佢話淨係同股東都要傾好多次，估計起碼半年之後先至掂。
施老闆話，呢幾年地產好景，集團搵到啲錢，希望業務多元化，辦報係因自己有啲傳媒經驗。
中記辦報，對以地產廣告為主嘅報紙，或者對手美記，甚至成行有乜影響，好多人關心，話唔定遲吓會有份《美聯日報》。
老施噚日同董事張奕威參加苗圃行動「助學長征」籌款，行四川瀘定橋一段，七日九十公里，噚日第一日。恒基張炳強，專程由加國返嚟參加呢個慈善活動。
地鐵商場增至五個，最新係將軍澳坑口站連理街商場。公司好重視，頻頻搞推廣，日日有驚喜。五月一號開張，請嚟藝人陳豪同廖碧兒做嘉賓。地鐵物業總監何恒光，同信和執董黃永光剪綵。
個場可出租樓面只有兩萬零呎，得五十四個舖，一百至三千呎，不過，每年都收二三千萬租㗎。
另外，九龍灣德福廣場五一舉行購物日，送二十萬現金購物券及房車抽獎。
呢排唔少高回報工廈成交，主要喺火炭，蘭西報咗兩日，有紀經欲罷不能，話又有投資者用大嗱嗱四千五萬，掃入火炭沙田工業大廈十萬零五百呎，包括地廠、天台平台及十二個車位。
美記話，四百幾蚊呎，價錢合理，部份連約，月租五蚊一呎，回報十四厘。
火炭地廠，交投幾頻密，尤其自從舊年爪哇以五億幾買入惠康倉，進一步刺激市道。
沙田工廈樓齡高，勝在近火車站，交通方便。
好僱主難求，有啲機構就舉辦獎項表揚。恒基恒益物業管理，最近獲新界社團聯會再培訓中心，頒發「愛心僱主榮譽大獎」，表揚佢哋積極聘用及栽培該會學員。
同時，富城再獲環球管理顧問翰威特，選為2005年度「亞洲最優秀僱主──香港」第三名，連攞兩屆。
呢個獎，每兩年選舉一次，用以評審企業表現，以及人力資源管理實務之間嘅關係。
電郵地址：[email protected]