注重企業形象嘅國泰航空早前推出一個細路女喺機場同飛機上一輪嘴講嘢嘅廣告，八方噚日喺國泰城終於見到呢個廣告嘅女主角，就係年僅五歲嘅吳珞辰Rosemary，珞辰重讀緊幼稚園，口齒靈俐鬼咁精靈，識得用六種語言同人打招呼，記者問佢鍾唔鍾意拍廣告，佢老老積積咁話拍廣告好辛苦，因為要零晨四點起身開工，不過好彩拍廣告有雪糕食同埋可以住機場酒店，咁就辛苦啲都值得。
珞辰媽媽吳太話，個女平時都成隻開籠雀咁，廣告入面一輪嘴嗰段對白，原來係佢自己度出嚟，唔怪得效果咁好，珞辰呢個廣告大受歡迎，但有關方面冇透露片酬多少，珞辰有冇得免費搭國泰機，亦無可奉告。
傳真︰2623-9278
電郵︰[email protected]