唐英年份預算案上星期無風無浪喺立法會通過，大家可能冇注意，四十五條關注組嘅湯家驊對港台嘅撥款忽然好有興趣，企起身質疑政府蝦港台，今年撥款只有三億八千萬，比上年度少咗成一成半。
嘩，連班大狀都感興趣，八方都好出奇。回歸之後，港台一直係眾矢之的，張敏儀頂頂吓都要去咗東京，朱培慶接棒，亦唔易擺平班土共，加上港台中人好多重發緊大夢，唔知死，一單又一單官非，予人口實，借勢開刀。
𠵱家情況更複雜，皆因煲呔曾竟然成為新的特首真命天子，佢點睇港台呢個燙手山芋真係冇人知，八方可以講嘅係，喺各路人馬包括鄭大班不斷施壓叫唔好與商營電台爭利嘅情況下，港台可能要作出讓步，不惜忍痛結束賽馬節目，以保住十大中文金曲同埋財經講股。
話港台揮淚斬播馬一啲都唔誇張，因為佢哋個賽馬節目贏緊商台，好受馬迷歡迎，贏人都要摺，幾令人洩氣；另外喊得一句句嘅梗係以董驃叔叔為首嘅馬評人，好似陳華棟、馬明、何其準、馬恩賜以及廖浩然，因為佢哋分分鐘失業；至於馬迷少咗啲貼士同資訊贏唔到馬，就只好哭馬喪啦。
今次事件，八方又好難懷疑鄭經翰係咪假公濟私，佢同商台俞琤反面在前，冇理由重為商台出手。點都好，港台知道難逃一劫，長痛不如短痛，先行壯士斷臂。唔播馬的確可以即時慳唔少錢，聽眾又唔使投訴逢賽馬日少咗節目揀，正所謂一舉幾得，何樂而不為？
八方一位標準馬迷朋友一聽到話港台諗緊cut賽馬節目，馬上話要去拉橫額抗議，真係好激。馬季未收鑼啫，如果閣下係董驃擁躉，呢輪就記得聽多啲港台，唞暑之後，就好可能冇得聽喇。
傳真︰2623-9278
電郵︰[email protected]