玩暗殺、執行秘密任務，日本仔有隻《MetalGear：Solid》玩到出晒位；鬼佬就話唔輸蝕，早幾年出隻《SPLINTERCELL》鬥搶客。唔經唔覺已出到第三集，新作《混沌論》落到XBOX、PC版手上，不論喺畫面、氣氛營造上，都做到電視遊戲嘅最高境界，更被歐美一本XBOX雜誌評為9.9最高分，重勁過Microsoft自家嘅《HALO2》等大作！
記者：許福合
遊戲類型：間諜動作
對應機種：XBOX/PS2/GC/PC
遊玩人數：1人至4人（XBOX版支援Live!）
開發商：Ubisoft
XBOXLive特色：語音通訊、網上多人對戰、遊戲內容下載、排行榜
XBOX版售價：$299
(c)2005UbisoftEntertainment
同一般第一身射擊遊戲一樣，玩家本身都會配備一身火力強大武器，不過正所謂以靜制動，要孤身進入敵方陣營，唔驚動敵人當然係最佳辦法，為咗令玩家更清楚自己「注目」程度，喺畫面右下角就會顯示噪音同匿藏探測器，噪音顯示跳動會較為明顯，即使腳步聲都會反映出來，而匿藏顯示一有反應就要小心，代表已經有敵人注意到你，要快啲搵地方收埋自己！
靜靜雞從後偷襲
當萬一被人發現，就要以最快同最簡單方法清除敵人。此集遊戲殺人方法多好多，唔用槍重可以倒吊扭斷敵人條頸，不過筆者最愛用從背後打暈同殺死對方，但使出呢招前要靜雞雞走近敵人背後出手，都有啲難度，但勝在乾手淨腳！殺咗人都咪開心住，因為呢個係特務Game，屍體唔會好似其他Game自己消失，要親自出手清理，將屍體搬到陰暗處以防被人發現，咁就可以降低被人圍抽危險。
間諜道具花樣多
《SPLINTERCELL》作為Game界嘅007，除身手好外，更要有一身007一樣間諜裝備先能夠應付任務，而且武器更會隨遊戲進行加入及與其他裝置組合升級。例如招牌武器SC-20K突擊槍，就有新配件，可變身成為狙擊槍或散彈槍，以應付唔同環境。透過十字掣更可轉換感應器，夜視鏡、熱能感應器等，因為大多喺黑暗環境進行，夜視鏡就經常用得着，而熱能感應器更可輕易找出附近敵人位置，非常好用。還有比較特別嘅StickyShocker，只要預先向地面「水氹」發射，當敵人踩過就會全身麻痹而被制服，又唔會驚動敵人，非常配合「特務」身份。不過玩之前最好多看說明書，因為遊戲之初並無教學版圖，一開波就埋牙肉搏，雖然難唔到有經驗玩家，不過遇到特別道具就隨時被考起，如開鎖工具，筆者就要睇番說明書先識用。
多人齊玩分工合作
當單人匹馬玩到悶悶哋，又可轉玩合作模式，玩法雖然差唔多，不過就多咗好多合作元素。例如可以合作爬高爬低、分享視野同裝備，甚至當隊友受傷，更可以負起治療之責。想熱鬧一啲，更不能不提Live!嘅連線玩法，可以多人對戰或組織隊伍作賽，變得更襟玩！此Games有個特點，就係畫面較暗，事關講間諜做秘密任務，自然唔會光明正大，筆者有玩過《SPLINTERCELL》上兩集嘅PC版，發覺畫面明顯變得更有動感；例如一開始係海灘，海浪效果就非常真實，而當落雨嘅時候，雨水打落身上更會有濺開來嘅效果，加埋特別嘅光源設計，人物嘅影子會隨動作而變化，畫面細緻程度非一般遊戲可比。
