四月二十一日本欄講「西九龍豪宅」，內提到報紙標題。投資老手黃師傅睇到，話寫得唔錯，左丁山為之飄飄然咗一陣。
黃師傅縱橫股海三十餘年，未夠六十歲，已經退休幾年，每日在屋企對住電腦三四小時，平均日日賺番三千至三萬，生活寫意到極，最鍾意請後輩食飯，佢所住嘅豪宅，每月淨係交管理費都已經多過一萬銀。所以話，一技傍身，足以自豪，黃師傅年輕時交咗唔少學費，邊做事邊炒股，累積多年經驗，見盡起起跌跌，已練就泰山崩於前而色不變，別人走火警之際，佢就入火場執平貨；別人興高采烈大大注之時，佢就悄然離場；冇人敢買之股仔，就係佢嘅一杯茶，從來都膽大心細，止蝕快，賺得狠，我哋武功淺薄之輩，學都學唔嚟。佢日日同我哋講如何上車落車，我哋仍然miss班車，所以佢退休享福，左丁山仍然爬格子操勞。
黃師傅話英文報紙啲標題偶有佳作，例如中英談判進入最後階段，英國決定將香港交回中國之後，英國外相賀維（Howe）訪港，與港督尤德（EdwardYoude）會面，當時嘅外交部副手叫做雷斯（Luce），《南華早報》整條標題HoweYoudeLuceHongKong，讀起上嚟，就似足HowyouloseHongKong，曾經傳誦一時。
黃師傅年輕時候去台灣旅行，適逢美國阿拉巴馬州州長華來士（Wallace）到台灣訪問，此君乃死硬白人至上派，歧視黑人，曾競選民主黨總統候選人，當然輸晒啦，佢亦係堅決反共分子，到台灣自然好受蔣總統歡迎，當年台灣報紙一律直排，橫排被視為親共，如招牌橫寫，要由右至左（唔係今日咁樣全部由左至右），黃師傅記得一張報紙，好似係《工商時報》，為咗華來士，特登將標題橫排，大書「華來士來華」，無論從左至右，從右至左，都係一個意思，真係天衣無縫也。