劉德華噚日接受新城訪問，講到《無間道》荷李活版嘅《TheDeparted》主角造型曝光，問華仔覺唔覺得由麥迪文（MattDamon）嚟扮華仔嘅劉健明好似肥咗啲？華仔笑笑口話：「唔係呀，幾好呀，造型唔影響成個故事大綱。我就好想睇導演馬田史高西斯（MartinScorsese）點樣將一個以香港為背景嘅故事，同埋咁濃厚佛教味道嘅戲拍成荷李活片，想睇佢點樣演繹。」
華仔重話睇過史高西斯執導嘅《紐約風雲》，佢重好大膽咁話周星馳自導自演嘅《功夫》喺畫面同角度有好多都係抄呢部戲。
另外，有雜誌報道華仔同緋聞女友朱麗倩喺馬來西亞買大屋，鄰居重稱呼女方做劉太，華仔話：「我冇買過樓，我有錢都用嚟投資電影啦。」對於電影工業應變小組就有關網上侵權採取民事行動，華仔話訴訟費好犀利，好多時都會庭外和解，所以佢覺得政府應該喺法例上幫手配合。
由恒基兆業地產同香港小輪主辦嘅「中國電影100年」選舉記者會噚日喺中環舉行，選舉會選出「最愛十大電影」、「最愛導演」同「最愛男、女演員」。「最愛十大電影」方面，影迷可以喺香港電影金像獎協會早前公布嘅一百零三部最佳華語電影包括《臥虎藏龍》、《阿飛正傳》同《英雄本色》等中選出心水，投票由今日開始至下月二十二號止，得票最高嘅十部電影會喺六月UA院線再上映。
梁詠琪（GiGi）新歌加精選大碟《順時針》下個月推出，入面嗰三十首歌全由GiGi親自揀選。GiGi話今次簡直絞盡腦汁，搞到連續五晚失眠，重要靠止痛藥嚟紓緩頭痛。而GiGi日前就幫親自作曲嘅《順時針》影宣傳照，攝影師喺牆上擺咗支時針，而GiGi就發揮想像力，喺十二點鐘嘅地方畫咗隻鴨，認真搞鬼！
陳淑蘭同寇鴻萍前晚喺銅鑼灣欣賞電影《3X之特種叛變》，聽到佢把聲好沙，蘭子話：「葉德嫻已介紹我去跟聲學老師學講嘢，佢話可能平時我用錯方法，搞到把聲好傷。」蘭子又話遲啲會進軍商界做推廣工作，但仍會繼續兼顧娛樂圈工作。
曾志偉噚日去尖沙嘴幫好友曾智明嘅金利來新店擔任剪綵嘉賓。對於電影《阿嫂》女主角劉心悠話黃秋生喺片場大講三級笑話，志偉笑笑口咁話每次都係秋生最多新聞，博宣傳嘅都係佢，𠵱家個女仔都係學佢宣傳自己啫！志偉又話秋生若果講不文嘢，都係同男人講好啲，因為同阿嫂講要將啲有味笑話繙譯成普通話，咁都好難啫。
鄭裕玲（嘟嘟）前晚喺將軍澳主持節目《百法百眾》，講到有人話佢主持時成日鬧人，嘟嘟話：「有好多人鍾意俾我鬧呀。」日前有觀眾投訴《百》嘅答案有判斷錯誤之嫌，嘟嘟話：「我哋現場有律師，拍時都睇過晒，連用嘅字眼都傾過先講嘅，好穩陣。」
