黎姿昨早旋風式抵達東莞剪綵，短短個多小時已為她帶來六位數字酬勞，現場有約十名工作人員護駕出巡，排場十足。但儀式進行期間禮炮煙花從四方八面而來，嚇得見慣大場面的黎姿花容失色，惟有在台上以手掩護頭部。
黎姿昨日應邀到東莞為一生活時尚中心任剪綵嘉賓，吸引數千人圍觀，並獲該集團贈送一張會員金卡，可在中心內免費購物，本來黎姿欲在中心內參觀選購母親節禮物，但由於群情太過洶湧，最後只好打消念頭。
剪綵時黎姿在台上被煙花禮炮嚇窒，有點失儀，她說：「我已經盡量保持儀態，但啲煙花禮炮太勁，而且放嘅時間好長，我諗住頂唔順就落台先，好彩都冇事，不過原本都想買份禮物給媽咪做母親節禮物，但人太多，根本唔可以停低，惟有返香港先買。」
自從《金枝慾孽》效應後，黎姿坦言去年底至今剪綵及廣告工作量大大增加，而且薪酬亦有升幅，可謂豬籠入水，黎姿說：「舊年年尾到𠵱家剪綵都有約二十個，升幅都有四成，而廣告升幅重大，好似今次呢個活動都有六位數字㗎，希望日後都可以保持住，廣告愈多愈好啦。」
採訪、攝影：曾小嘉
