隨住小提琴手陳美（Vanessa-Mae）喺國際走紅，英國喺過去幾年出咗唔少走性感潮流路線嘅古典樂手，好似繼年前嘅bond同Planet後，近排又有一隊叫Wild嘅古典組合，呢五位分別嚟自英國同塞爾維亞嘅靚女，喺首個MV《Hipnotic》裏面已經大騷性感本錢，佢哋重鐵定喺下星期一首次到訪香港，宣傳佢哋嘅新大碟。
Wild嘅五位成員早喺兩年前已經開始夾歌，準備進軍國際樂壇，佢哋嘅成員分別係主音兼鋼琴手IvaCojic、小提琴手IzzyJohnston同KatieFenner、中提琴手Chantal Leverton同鋼琴手AndjelkaRistic。佢哋個個由細開始已接受傳統嘅古典音樂訓練，有兩個成員重係英國皇家青年管弦樂團嘅成員，演奏功架絕對有番咁上下。
而近日去到南美同歐洲各地宣傳嘅Wild，喺最近MV《Hipnotic》一齊作性感打扮演出，佢哋不但酥胸半露咁以濕身打扮演奏樂器，重不時做出引人遐想嘅表情，一定冧死唔少麻甩fans。Wild五位成員除咗下周一訪港外，下周三重會喺海港城表演，到時能唔能夠做出Maksim到訪時，師奶迫爆商場嘅盛況，就真係要拭目以待。