老董位過氣國師葉國華噚日同班行家食飯，佢話由於李永達會選特首，所以佢唔去馬啦。有知情人士同八方講，葉國華同中方人士講選特首嘅時候，中方人士不置可否，但就猛讚煲呔能力好又廉潔，出差唔會亂使錢，咁即係暗示唔想有人撼煲呔啦！葉國師咁醒爬，即刻收到。睇嚟四個小矮人最後分分鐘得番兩個爭（金勞詹未必會去馬）。
講番煲呔，噚日佢喺立法會同班議員過招，馬丁同馬力都讚煲呔比老董嘅表現好。老董年代，八方通常聽到中途就頂唔順，噚日就聽晒成場，一來間唔中都有啲笑話，二來保皇黨都好搏命咁砌煲呔，令答問大會多咗唔少新火花。
好似田少咁，就砌煲呔成日話西九龍要聽市民意見，但就隻字唔提要聽立法會嘅意見，咁點改善行政立法關係呀？煲呔即刻補飛話，佢其實係用個「縮寫」嘅講法，市民嘅意見其實包埋立法會，因為佢哋都要通過議員，先知道市民點諗啫，搞到田少一時間都駁唔到嘴。
煲呔明明冇提立法會，都話自己其實有講到，好似人大釋法咁。煲呔咁快學識人大嘅真傳，怪唔之得中央咁信佢啦！
傳真︰2623-9278
電郵︰[email protected]