教育統籌局局長李國章一向火氣好猛，前日就喺立法會公開點名批評代表教育界嘅議員張文光，話佢喺建新校嘅立場搖擺不定。張文光當然即時還擊，指政府錯誤估計新來港學童人口，話李國章淨係識得推卸責任。兩個大男人呢頭各執一詞、互相指摘，點知噚日八方就見到佢哋喺署理行政長官答問大會後鬼咁好傾，狀甚老友。
八方當然問吓張文光，佢哋兩個有乜咁多嘢講？張文光話，李局長問佢下個月八號搞個爭取小班教學遊行，係咪想佢冇官做？重為日前件事主動提出講和。張文光又話，李國章去親立法會都會躁狂病發，今次主動講和，可能係喺身處大陸訪問緊嘅國民黨主席連戰身上偷師，實行「和平奮鬥救中國」。教統局常秘羅范椒芬噚日亦為件事降溫，話議會唇槍舌劍情況喺民主社會好常見，最緊要係講事實同道理。
傳真︰2623-9278
電郵︰[email protected]