胡杏兒、陳鍵鋒和胡定欣等日前在灣仔拍攝新劇，胡杏兒和胡定欣本是一對好姊妹，卻因為陳鍵鋒而釀成三角關係，令胡定欣當街灑淚，陳鍵鋒卻因而沾沾自喜。
胡杏兒、胡定欣及陳鍵鋒日前於灣仔金紫荊廣場為無綫新劇《識法代言人》拍攝外景，由於該區有不少自由行旅客到訪，並希望與三人合照，故三位演員立即由主角變成布景板，杏兒自言並不介意，她說：「嚟得呢度拍都預咗啦，有咁多人支持自己都好開心嘅。」
劇中胡定欣與胡杏兒乃是一對好姊妹，胡定欣因暗戀陳鍵鋒，又以為杏兒想搶走對方，因而演變成一幕爭仔戲，胡定欣更當場哭成淚人。由於拍攝多次，胡定欣惟有用眼藥水代替淚水，她說：「其實滴咗幾滴已經係真嘅淚水，可能我滴得太多，落晒喺喉嚨度，好苦，直頭苦到喊出嚟。」
劇中兩位好姊妹爭仔，想不到現實中胡杏兒亦同樣經歷這種事情，她說：「以前讀中學時有個韓國女同學同我好好姊妹，佢鍾意咗男仔，點知個男仔又係鍾意我，不過我對個男仔完全冇感覺，所以同今次有少少唔同。」
問到陳鍵鋒在戲中同時被兩位靚女愛上有何感覺時，他沾沾自喜地說：「原來我真係咁厲害㗎！我都試過有女仔鍾意我，重好有誠意咁想打動我，但係唔得就真係唔得嘛。」
