中央人民政府再次釋法，當奴曾處女考牌，親自赤膊上陣，立法會落場，好似走落羅馬鬥獸場咁，做齣好戲，畀大帝欣賞！
壽爺尚未鼓掌，點知廢董以「政協副主席」身份，竟然肉麻挺曾，大讚當奴有「卓越能力」，有「豐富經驗」，並模仿左報共黨社論八股台詞，話當奴一定可以開創治港美好新篇章！
廢董出咗聲之後，喺政府高層小圈子，當堂多咗個新花名，叫做「霍英西」。點解？一個英東，一個英西，好似一對門神，兩個都咁高咁大，一個當年狂呼「我挺董」，結果挺到廢董提早執包袱，𠵱家「霍英西」效法英東大嗌「我挺曾」，真係風水輪流轉。嘩，咁以後當奴頭上除咗廖暉、壽爺、大曾，咪多咗一對紙板太上皇？計埋久唔久就出吓聲嘅領呔大王，同埋北角皇后蔡素玉，一班附屬主人，夠打一枱麻雀，而煲呔就負責遞熱毛巾兼侍奉糖水！
不過亦有心水清人士話：查實唔係！廢董肉麻挺曾，查實係彌補番董A1日前在送董宴上，遭當奴激吻之後憤而Fing手拒絕合照嘅莽撞行為！今時今日，廢董有求於曾爵士，成立一個「特首退任後特權待遇委員會」，模仿美國總統退任，要求有辦公室、女秘書、座駕、啹喀保鑣、私人飛機。
董A1怒Fing當奴友誼盛情之手，爵士大量，就算照樣批准廢董大魚大肉嘅退任特權，但三司十一局及成班AO，見署理特首受到輕薄，見義勇為，保護爵士顏面誓死聯署反對，咁董生第日冇晒特權不特已，咪分分鐘變咗劉少奇咁嘅下場？
所以大家都話，廢董今次掩住良心挺曾，忍辱負重，政治智慧大有增進，可惜遲咗少少啫！
傳真︰2623-9278
電郵︰[email protected]