愛華頓早前破宿命主場贏「紅魔鬼」曼聯，但就有古講，足總調查「拖肥糖」有無刻意收埋比賽用嘅足球，借助拖延戰術贏波。
原來當時比賽由鄧肯費格遜下半場十分鐘攻入咗一粒後，愛華頓工作人員開始走到球場四周圍，將比賽用嘅足球收埋，搞到得番一個足球喺比賽時用，等每次執波都嘥時間，情況好似以前足球比賽最常用嘅拖延時間戰術。足總職員現時就調查愛華頓有無違反球例，話晒自從國際足協訂出賽事用多個足球，務求比賽節奏明快後，未試過有球隊「反行其道」，我求大俠都好難定斷。
愛華頓班職員咁都諗得到，可見佢哋好緊張聯賽第四。不過，𠵱家同「紅軍」之間嘅歐冠盃席位問題重未有定案，「拖肥糖」為咗歐冠盃外圍賽席位真係有排煩。
迪奧夫想學簡東拿
迪奧夫今季多次「口水」攻勢惹來唔少麻煩，呢位塞內加爾前鋒就話，簡東拿以前一樣用「功夫腳」踢水晶宮球迷，最後都得到曼聯球迷支持同尊重，所以亦會以簡東拿為學習目標。最近，保頓有意同利物浦傾佢簽長約嘅事，但如果佢話學簡東拿，領隊艾拿迪斯真係要諗清楚。
朗尼識搵荷李活錢
曼聯嘅英格蘭國腳前鋒朗尼一直被認係洗腳唔抹腳，但佢其實都識得理財。有消息話佢已入股拍過《帝國驕雄》同《黑鷹十五小時》嘅英國大導演列尼史葛嗰間公司，準備去荷里活搵錢。如果係真，唔知朗尼會唔會搵佢嗰位好想去荷里活拍戲嘅師兄碧咸做男主角呢？
沙維奧拿求返巴塞
今季被外借到法甲聯摩納哥嘅前鋒沙維奧拿，來季就好想可以返番去巴塞博取上陣機會。據講巴塞隆拿教頭列卡特對重新起用佢興趣不大，為此佢表明願意自減人工及入球獎金。我求大俠認為佢都唔使做到咁委屈嘅，叠埋心水搵過第二隊落班，好似同鄉列基美咁都發展得幾好吖！
韓贊助商算死草
啱啱同車路士簽咗份總值五千萬鎊嘅贊助合約嘅南韓電子巨人三星，原來都有贊助「兵工廠」阿仙奴，但就淨係向該支倫敦球隊嘅職球員提供手提電話；聽講喺下年夏天約滿後，佢哋唔諗住再贊助阿仙奴。話晒車路士同阿仙奴係同市球會，又係英超死敵，三星咁做都係無可厚非。