港股結算日又好番，埋單升69點，早段升過117點。喺早段最高時追入熱門C輪，例如長和C輪，到收時原來已經坐艇15%以上。高價追貨，無論係追C輪或者P輪，都好蝕章。高價買完C輪，撞啱個市回吐，輸錢。高價買完P輪，撞啱個市挾返上去，又輸錢。
新地C輪4643：新地（016）早段見75元，升0.50元，熱門C輪4643見53仙。新地平收75.50元，隻輪散落46.5仙，全日低位收，跌9%，喺低位揸貨，相對安全啲。4643喺6月初到期，溢價0.2%，槓桿率16倍（有效亦係）。
4631亦係新地熱門C輪，昨日只跌2%，正股如果上升，4631冇4643彈得咁快。
期油窩輪：期油C輪4861與P輪4865首日登場，每100份輪代表1桶石油。兩隻輪都係11月中夠鐘。
4861輪價48.5仙，溢價16%，槓桿率8.3倍（有效4.2倍），引伸波幅47%。4865輪價53仙，溢價14.5%，槓桿率7.8倍（有效3.2倍），引伸波幅47%。咁嘅數，你買埋我份。如果兩隻一齊揸到尾，肯定輸到呱呱叫，除非油價升得好多好多，或者跌得好多好多。
章盛