噚日中電喺半島酒店開股東會，綠色和平就上演一場「內外夾攻」嘅抗議行動。一批來自亞太地區嘅綠色和平代表喺場內當面質詢中電「小電王」主席米高嘉道理，批評中電投資燃煤電廠破壞地球生態環境。另外，四名綠色和平代表喺酒店外牆掛起一張寫住「中電，氣候破壞者」嘅巨型橫額。
綠色和平氣候變化及可再生能源項目主任張韻琪話，中電燒煤釋放二氧化碳導致氣候變化，難辭其咎。佢又話，中電每賺一蚊利潤，地球就需要花上三蚊嘅成本去補救對生態環境造成嘅破壞。
米高嘉道理就喺股東會上話，佢好明白燃煤發電會污染周圍嘅環境，但係就要喺經濟發展同環保取得一個平衡。佢重話，家族四代都住喺香港，大家一同呼吸空氣，佢又點會唔理呢？
講番個股東會，流程都算幾暢順，只係有好多細心嘅股東，問咗好多連八方都冇諗過嘅問題，令股東會超咗少少時。喺等緊議案表決結果嗰陣，中電向股東大派半島朱古力，恨死隔籬嘅股東。
傳真︰2623-9278
電郵︰[email protected]