呢輪咁多人歡送老董，立法會執輸行頭，但係都唔可以當冇件事。八方聽聞，主席范太自己出手做東，五月六號星期五喺立法會請食晏，名為宴請董生伉儷，五十九位尊貴議員都獲邀出席做陪客，費用全免，睇怕班議員都冇嘢好講，唔可以嫌貴唔參加。
結果到噚日為止，一共有十三位議員話嚟唔到，當中包括吳靄儀、馬力同埋長毛，但係啲前議員就相當踴躍，𠵱家估計應該開到六、七圍枱，白鴿黨黨魁達仔話，依禮佢都要去，但係成個黨就未必到齊。
時間過得真快，八方重記得今年二月十八日新春期間，又係范太請客，當時有人請老董耍兩吓太極，點知佢好堅定不移咁話，佢發過誓，對住立法會議員佢唔會耍太極，語帶相關，雖然嚴肅咗啲，但係引得大家拍掌叫好。
兩個多月後，老董不再是特首，唔知佢會唔會喺班議員面前，露番兩手呢？
傳真︰2623-9278
電郵︰[email protected]