韓國盛產肌肉男星，早前就有個韓國女性網站搞咗個「按部位最性感藝人」嘅選舉，結果肌肉型男權相佑嘅腹肌喺女網友眼中最性感，人氣男歌手Rain就憑最迷人嘅屁股同背脊迷倒女網民，而性感女歌手李孝利則擁有最引死人嘅靚股。
韓國女性網站www.bomnalfitness.com早前舉行投票，由四千多名會員投票選出「按部位最性感藝人」，其中以一身結實肌肉迷倒女fans嘅「誠俊哥」權相佑，同喺劇集《浪漫滿屋》中經常露胸肌嘅Rain鬥得難分難解。
權相佑喺「最靚腹肌」環節打低咗Rain得第一名，不過，Rain就以些微票數贏番權相佑，被網民選為「最靚背影」同「靚股」嘅得主。此外，早前為拍攝寫真集而瘋狂減肥狂練肌肉嘅裴勇俊，就成為「最靚背影」嘅第三名。
女藝人方面，經常以性感打扮喺舞台上表演嘅李孝利，就成為「靚股」同「最誘人腰肢」嘅冠軍，唔少投票嘅女網友都表示希望擁有好似李孝利一樣性感同纖瘦嘅身形，而女星全智賢亦被選為「靚腳」嘅第三名。