【本報訊】小情人廝守到老，也許只是童話故事，但現實中愛得死去活來、為情輕生的個案則是永不止息。有臨床心理學家表示，失戀是平常的人生經驗，但部份人會因情緒困擾而被迫停止工作；有人甚至會因傷心過度而暈眩和虛脫，所以建議遇上如此極端情況，應往急症室求助。 記者：張嘉雯
「肝腸寸斷」、「心如刀割」的感受，只有經歷過失戀的人才會明白。臨床心理學家胡潔瑩博士指出，有些人為情所傷，情緒大受影響，認為自己「一定捱唔過」，或覺得「永遠唔可以再有幸福」；「有啲人情緒好激動，悲傷過度，令身體都出現反應，好似心口翳住，嬲到全身震，喊到虛脫，或者好多晚都瞓唔到，胃痛呀，心跳、手震、頭暈。」
胡潔瑩續稱：「遇到呢啲好緊急嘅情況，情緒已經影響到身體，其實可以去急症室，亦可以搵社工，或者社署家庭服務部嘅廿四小時熱線。」她指，部份人或無法入睡，有「生無可戀」的感覺，極少數人甚至會選擇輕生，過去也有不少人因失戀情緒失控而到急症室求助，但她提醒若非「真正危急」，勿使用急症室服務。
醫院一般會視乎病人情況，安排治療，包括處方精神科藥物及進行心理治療，「有啲人入咗院一晚，瞓一覺，第二日清醒番就冇事出院；有啲人可能持續幾日，反應好大，呢批人有部份係創傷後遺症或抑鬱症，未必係單一原因。」
失戀是常見的人生經驗，胡潔瑩稱，失戀者要面對現實，「應該諗『可能我keep唔到今次嘅關係，但係唔等於我冇用，重有朋友、家人同份工』，佢走咗就等於我冇用呢個諗法，根本係唔合邏輯嘅。」她建議戀愛中的人士，不要過於依賴伴侶，應有其他朋友，「唔好將所有精神精力都擺喺一個人身上，咁就唔會話冇咗佢就乜都冇晒，容易起番身。」
作為家人，也應接納失戀的人會情緒低落，陪伴失戀者過新生活，「有啲家人覺得，『唉，冇咗佢咪重好，你重咁唔開心做乜呢？』其實如果聽到煩聽到悶，可以同佢睇場戲都得。」她提醒失戀者盡量維持正常生活，並主動尋求協助，除友人外，可以直接聯絡臨床心理學家，或由醫生、社署或志願機構轉介至公立醫院的輔導服務。