理想家居1：家居博覽會明日開鑼<br>搶先試玩氧氣機即刻醒晒

理想家居1：家居博覽會明日開鑼
搶先試玩氧氣機即刻醒晒

「新一代家居博覽會」將於明日開波，除了以一站式齊全家居用品作招徠，當然重有霸頭位免費抽獎一環，不過講有噱頭，點都要睇新鮮嘢先夠過癮！全場幾乎每個攤位都會力谷新貨上場，無奈礙於腳骨力同時間問題，兼且此非「毅行者」比賽，行唔晒冇緊要，最緊要識揀好嘢行，本報已經率先預覽，精選以下五大必遊「景點」，到場人士萬勿錯過！

記者：張銘恩　攝影：黃子偉　模特兒：JoeyMo

第1玩
試用全港首部
HandCarry氧氣機

晨早起身排咗幾個鐘頭隊，入到會場第一時間去吸啖氧氣醒醒神先，唔係點夠精神行足一日？㗎妹近年潮興去氧吧吸氧，因為有醫學證明足夠的氧氣，可以有效加速新陳代謝，令健康保持最佳狀態，而且對於消除疲勞、舒緩身心壓力都有功效，即係人都靚啲精神啲，係女都Buy啦！所以近年香港亦有美容院引入氧氣機，不過下下要去美容院就非常麻煩，而且閒閒哋一個護理都要Over五百蚊，𠵱家Panasonic推出呢部便攜式氧氣機，可謂食正條水，輕巧機身買部放屋企，每日吸一吸精神暢旺，重可以帶返公司同姊姐們一齊分享。
攤位G01-06

無添加

當空氣進入氧氣機，其內置的「添氧濾層」便能將氧氣濃度由一般空氣中的21%提升至30%，用者只需戴上Headset狀的專用氧氣吸入器，將噴嘴調校至合適位置，便能輕鬆享受天然氧氣，不用添加任何化學物質。$3,580

■機身細細輕巧，全日本製造，操作簡單，只設有開關及10、20及30分鐘的時間掣。

■背面安裝了過濾層及抗菌濾層，有效阻隔空氣中的細菌及病毒，確保釋出的氧氣清新潔淨。

■噴嘴預留了空間畀大家放入香精，咁就可以吸氧同時吸埋薰衣草等香薰，夠晒Relax！

女士點睇

黃小姐
■「我都有去開氧吧，對呢部機都有啲興趣，三千幾蚊唔算貴，用得十次已平過美容院！」

Joey
■「部機夠細夠方便，吸起嚟感覺舒服啲，喺美容院做時要用兩條喉管插入我鼻窿，好似病人咁，有啲怪！」

第2玩
感受RainShower
按摩水力

德國浴室用品名牌GROHE會於場內設置歷來最大的花灑試水區，一共六組接駁了水源的RainShowerPanel（雨淋系統）設於透明膠室內，畀大家即場睇睇在沒有加壓下的水力有幾勁，可以親身試玩其中一組，放心，唔係叫大家當眾沐浴，而係伸手入去試試其按摩功能有幾舒服，一向甚少品牌會「夠膽」咁做，因為不少品牌的ShowerPanel構造其實並不太適用於香港，不但射出的水力唔夠，甚至會連熱水爐都撻唔着，既然咁難得，梗係要一試。而今次展出的會有GROHE最新的設計，優點係在低水壓的情況下仍可發揮超凡的淋浴效果，可用於一般煤氣爐，而且所佔空間較小，全部德國製造，最正係會以幾千蚊的超筍價益會場人士，重即送Crabtree&EvelynAloeVera淋浴套裝（$590）！
攤位F07-10

■Aquatower2000，流線型鋁合金外殼，獨特30度側噴按摩花灑頭設計，體貼身體每一個部位。$7,188

■Aquatower1000，手表外形予人年輕之感，內置恒溫系統，能自動平衡水溫和水壓之變化，保持穩定性。$6,388

第3玩
Hi-Tech門鎖任你遙控

專門售賣門鎖的PLC則由以色列引入咗最新推出的遙控門鎖Mul-T-LockMDS2000，操作如車匙，一出𨋢㩒一下遙控，大門即時為你而開，15呎內生效，非常方便慳時間。同時亦可以自設密碼開鎖，亦備有最原始的鎖匙開鎖。其防撬及防鑽鎖膽大大提高防盜性，並有夜光照明系統。咁Hi-Tech，一般屋好少用，真係唔買都玩吓啦！
會場價$2,624（原價：$3,280）
攤位E01-06

■一時間冇電的話，可以9V電直接駁上，提供即時電力繼續使用。

最新版指紋鎖

同場亦有Hi-Tech的指紋鎖，美國ADEL最新出品，新在加了門抦，可以獨立一個安裝於門上，最多可識別138個指紋，全家人十隻手指輸入晒都OK，亦可用密碼或鎖匙開啟。
會場價$2,624
（原價：$3,280）

第4玩
腳底按摩鬆一鬆

行咗咁耐有啲攰，最好就係可以享受吓腳底按摩然後再博殺，即刻埋位試吓呢部新機！日本製造的Panasonic足部按摩機特有穴位指壓和揉揑功能，配合腳掌兩旁的氣墊按摩，做出人手腳底按摩效果，並首創3種腳掌尺寸選擇，配合不同Size的腳掌，從而更精確地刺激重要穴位，算係足部按摩機一大突破。$3,980
攤位G01-06

■按摩機上蓋可以拆下放入小腿，漸進式氣墊按摩有效促進血液循環，消除疲勞。

第5玩
坐梳化攤唞吓

如果按摩機多人排隊試玩，不妨去Giormani試坐梳化攤唞一下，多張全新梳化於會場推出，大大細細真皮織布單坐三坐L形乜都有，任你試坐，最正係65折發售，每日頭兩位購物滿$500的人重會送你一張型仔單座椅NOVA，有計劃買梳化的人記住第一時間去昅昅。攤位D07-10

■NOVA「h」形高背座椅，價值$1,700。

■織錦兩座位加貴妃椅，小巧精緻，啱晒兩人小家庭。W87"×H36"×D62"會場價$3,686(原價$5,670)

其餘有睇頭攤位

博覽會新貨之多，要全部介紹當然冇可能，繼以上必玩攤位之後，以下精選幾類特別有睇頭的貨類，各位可以多加留意。

GROHE×PORSCHE首度聯手

兩個看上去風馬牛不相及的牌子，卻可合作締造歷史，全球首個由頂級跑車品牌PORSCHE為GROHE設計的水龍頭，亦會首度於會場亮相，這個設計於去年榮獲德國的iFdesignawardwinner和reddotaward，會否以五位數字（$12,000）購買一個水龍頭見仁見智，但無論如何，都應看看這件藝術品。
攤位F07-10

■擁有F1的流線外形，簡單利落而充滿線條美。

PLC買一拖二

於PLC攤位選購特定新貨，可以免費揀多兩盞燈，選擇包括壁燈、座枱燈或座地燈，又係嗰句，梗有一款啱你嘅！
攤位E01-06

■子彈形膠燈，襯晒潮興的紅白部屋。$899

■簡約型仔方形膠燈，恍如盒子裏藏着皎潔明月。
會場價$1,899(原價：$2,399)

■較新款的全白膠片燈($599)和木盒座枱燈($699)亦是另一選擇，任你自行配搭。

彩芒室內無線電話

Amytel出品，彩色全圖像顯示屏，內置三款背景牆紙及螢幕保護裝置，並有18首和弦鈴聲選擇，當然亦有響鬧、計時及倒數等功能。$1,980
攤位U26-27

客飯廳全套家具$13,500

鍾意木製自然Feel家具的人就記住去SimpleLiving的攤位走一轉，因為在場會展出超筍的客飯廳套餐，全新設計會由$17,204減到$13,500，包起客飯廳基本家具如餐枱、餐椅、鞋櫃、梳化、茶几、電視櫃和腳踏，可揀選木料和蓆面，睇啱即訂做，唔使煩。攤位N01-03

博覽會詳情
日期：4月29日至5月2日（星期五至星期一）　時間：11:00am-7:00pm
地點：九龍灣國際展貿中心（可於九龍灣地鐵站恒生中心乘坐免費穿梭巴士前往）備註：入場費用全免

■飯廳套餐包括玻璃面實木腳餐枱+布藝餐椅四張，以及4呎鞋櫃一個。齋飯廳套餐：$9,670

■冇打算換大件家具，不妨揀吓細件飾物布置屋企，來自泰國的小花瓶，既可裝飾又可插花，於會場七折發售。
眼鏡款$126　欖核款$126　扁身圓形款$70