樓價愈升愈貴，連東涌洋房水藍天，都賣到成萬蚊一呎，物業包裝成豪宅，走高檔路線。噚日首次邀請傳媒去東涌睇示範屋，準備咗五架Benz，浩浩蕩蕩成隊到場，走嘅時候，就喺門口等候，真係夠晒氣派。
發展商香港興業今次嘅安排，都係為咗想凸顯洋房嘅尊貴，現場準備派發畀記者嘅樓書，每本都有記者嘅名，希望做到好個人化。
另外，發展商又請咗一對外籍模特兒，扮演夫婦，示範豪客生活。
除咗安排與別不同，示範屋嘅設計，都好有特色，樓底有十六呎高。尤其係主人房套廁，頂部裝咗個玻璃天窗，戶主可以一邊沖涼，一邊望住個天。不過，若果沖涼嗰陣，天台有人就大煞風景嘞，因為從其中一個類似通風口嘅地方向下望，可以望通主人房浴室，乜都睇晒。
豪宅市道火熱，連冷門豪宅都吸引買家，好似薄扶林碧荔花園單號洋房，剛由東半山外籍租客以千九萬承接，創八年新高紀錄，呎價近八千三。
第一太平戴維斯陳于白話，呢宗成交同九七年高峯期，大小相若嘅五號洋房造價，只差百五萬。
碧荔花園只得八幢半獨立屋。今次成交嘅，二千三呎，連逾六百七呎花園及平台。
對上一宗成交係四千呎八號屋，以一千五百萬易手，不過遠在○三年中，難作比較；同九七高位比，就更清楚睇到豪宅市道係幾咁熾熱。
今個月，因為有大型住宅新盤登場，整體住宅樓市買賣肯定勁旺，代理實行貫徹搵錢至上本色，所以個個都唔願意離開香港，以免錯失良機。
聽講，中原精英會原定四月搞嘅活動，都因為咁而取消，要擇日「重賽」，但精英會擔心，唔知拖到幾時至可以成行。
喺北望神州熱下，中記唔少活動，聽講都揀內地舉行，地點重遍及全國㖭。中記近年積極拓展內地業務，去內地搞活動，重可以因利乘便，順道了解埋當地樓市，一舉兩得。
銀行息口跟結餘及同業拆息變化而波動，一時傳會加息，一時又話會減息，連個樓市都受到影響。
聽講，有銀行聘用嘅估價行，較早時就因應本港可能加息，於是將物業估值調低，一降就一成多，但係，喺呢個市況下，業主又點肯同步減價呢。
樓宇按揭生意風險細，所以一直係唔少銀行嘅核心業務，呢間估價行咁做，係咪銀行授意，就不得而知嘞，但係銀行生意相信會少咗，因為買家肯定即刻行去第二間銀行做按揭囉。
電郵地址：[email protected]