鄭少秋（秋官）噚日喺九龍灣為喺紅館開嘅演唱會綵排，秋官話佢喺演唱會入面有十個造型，問佢怕唔怕換唔切衫，佢講笑咁話：「唔理得咁多，到時我喺台上面周圍換衫，我其中一個嘉賓鄧萃雯都會好似我咁喺台上換衫。」
問佢係咪老婆幫佢換衫，秋官即以大男人口脗話：「梗係要啦，佢得到咁多利益，所有收入都畀晒佢喎，唔使做番啲嘢呀！」再問秋官咁係咪淨係佢老婆先可以幫佢換衫，其他人就唔掂得先？秋官好搞笑咁話：「唔係，我都要喺台上換衫，不過我就墊晒嘢，重會攞個Cup保護住佢（指何B仔），唔畀佢走光。」
咁咪即係裝假狗，咁秋官又會唔會露罅呢？佢即刻好大反應話：「嗱！我冇話裝假狗呀，你哋話咋，我露唔露罅？唔係個個露都好睇㗎，人哋睇我就梗係才子佳人啦，又點會睇呢啲啫。」
莫文蔚（Karen）噚日到新城接受訪問，Karen將於六月開個唱，佢透露喺個唱入面得到名牌贊助六對鞋同大量絲巾，佢話：「我會用大堆絲巾布置整個舞台，而衫方面，會有一件用頭髮做嘅衫，亦有我構思嘅絲巾鞋，有女歌迷重要求我到時要着短褲，等佢可以睇我對腳喎。」
楊千嬅日前接受咗商台訪問，爆咗一單自己以前失蹤四十八小時嘅經歷，佢話當時未到三十歲，有一次因為心情唔好，於是粒聲唔出走咗去英國搵朋友訴苦，但第二日佢要去台灣宣傳，最搞笑嘅係原本諗住用里數換機票嘅千嬅，因為太趕嘅關係，最後要自掏腰包買商務機票，呢次任性嘅「教訓」真係昂貴！
汪明荃（阿姐）同胡杏兒噚日喺中環潔志街街市拍攝無綫新劇《識法代言人》，佢哋兩個出現吸引咗唔少買緊餸嘅師奶圍觀，阿姐話雖然平時甚少親自下廚，但係都鍾意帶埋屋企個菲傭行街市，佢話：「我會帶個賓妹去啲相熟檔口打吓招呼，豬肉檔個老細知我有三隻狗，買親豬肉都會搭三嚿骨頭畀我，真係慳唔少㗎！」
內地天后那英生完小朋友冇幾耐，早前就已經傳出佢嘅男朋友高峰有外遇，呢個傳聞唔多唔少都會令到那英心情受到影響。噚日有內地報道指那英帶埋兒子「高興」同一個朋友傾吓湊仔經嘅時候，發現那英原來患咗產後抑鬱症，但就唔係好嚴重，𠵱家偶然都會忍唔住寂寞而約朋友去唱K，避免產後抑鬱更加嚴重。
導演王家衞成立嘅澤東電影，指控替電影《2046》設計同製作網頁嘅LambianceDesignandMultimedia多媒體製作公司，在未經諮詢同意下，喺三月中蓄意將《2046》嘅網頁鏟走，又拒交還製作網頁用嘅電影硬照同宣傳片段等，影響澤東宣傳工作同籌組導演王家衞影迷會，令澤東蒙受損失，故入稟高等法院，要求法庭頒令該製作公司繼續運作有關網頁及交還所有電影版權物品。
案件編號：HCA742/05
