一晚使一千蚊絕對唔難，但係坐喺機舖「暢」成千蚊銀仔玩幾個鐘就真係好誇張！呢期機舖有部賽馬機紅到爆燈，晚晚都圍滿人，起碼要排足粒幾鐘機先有得玩。機迷阿雄就試過一晚玩一千蚊，佢重話大把機友都同佢一樣，每晚唔放低幾嚿水都唔安樂。估唔到喺虛擬世界做馬主，都要使唔少錢喎！
記者：馬慶武
攝影：黃子偉
跑馬仔跑足五晚
阿雄返寫字樓工，人工萬幾蚊，但大部份收入都用咗嚟打機：「我逢星期三要睇賽馬、星期五去玩健身，有時同朋友睇波，其餘時間放工後都會去機舖，一打就打到機舖兩點收舖。第二朝要八點起身，好眼瞓，但忍唔住都係要打！」
阿雄話因為自己都係馬迷，所以特別鍾意玩呢部GIWinningSire（Ver.2）賽馬機：「可以幫隻馬仔改名，又可以用唔同方法訓練，自製番隻『精英大師』都得！不過做每樣嘢都要用Credits，成日想自己隻馬快啲勁啲，咪用咗好多錢去訓練隻馬囉！」而且呢部馬仔機每場賽事都可以投注獨贏或連贏，贏咗Credits又可以用嚟養馬用，訓練、餵馬、出賽全部要用Credits。正所謂十賭九騙，自然愈玩愈多。
專家激評
機舖似比武場
《GameWatch》編輯朱雀：「𠵱家啲Game好快就由街機移植至家用機，機舖就好似一個比武場地，啲人喺屋企苦練完就會出嚟挑人機，試吓自己身手。而卡機咁流行，我諗係啲人唔多唔少有啲炫耀心態，有得儲低進度，又的確係好玩啲。」
勁搶錢！
《GameWave》編輯犬夜叉：「我都係打家用機多，就算打街機都會搵番啲易玩嘅舊機消磨時間，好似射擊Game咁，我就超期待10幾年前嘅『雷電II』推出新作，好似就快到港！同埋我估嚟緊新版WCCF足球卡Game一定會勁Hit，球季收咗，啲球迷一定會用部機頂癮，重有四大聯賽球星登場，正！不過勁搶錢！」
解構170萬巨機
六月勢爆炒卡熱
阿雄話，𠵱家每晚打機用$500至$1,000，一星期打三、四晚已經唔算誇張：「半年前左右，我打WCCF足球卡機，每鋪無論贏輸都要入$25，啲球星卡炒到成千蚊張都有人買，嗰排試過一晚打過千蚊㖭呀！」呢部足球機𠵱家已經少咗人玩，但喺今年六月將會推出新版本，唔止意大利聯賽，重要係玩齊四大聯賽。到時球星卡倍增，玩法更多，定必再次掀起熱潮！
今期六大Hit機
經過一輪機迷、機舖負責人及Game書編輯嘅投票，選出今期六大最Hit最多人玩嘅街機。最多人玩除咗「高達」及賽馬機外，體感遊戲亦係必然之選，最意想不到嘅係原來好多舊Game都重有大量死硬派捧場客，枕住入錢玩足幾年。
No.1
Z高達
家用PS2版都已經推出咗好耐，但係街機都重有好多人玩，全因可以挑戰不同對手。雖然PS2都可以網上對戰，但就唔夠臨場感。
No.2
GIWinningSire（Ver.2）
雖然唔夠Z高達咁多部機，但若只計每晚收入就定必係馬仔機贏晒，因為其他機幾蚊隨時玩幾十分鐘，賽馬機跑一場馬都唔見你幾十蚊。
No.3
鐵拳5
最新立體格鬥Game，Namco招牌作，同樣已推出家用版。
No.4
麻雀格鬥俱樂部
麻雀迷止手痕必玩，重可以越洋連線挑戰日本玩家，為港爭光。
No.5
頭文字D3
「頭文字D」係漫畫改編嘅遊戲機，可以一嘗狂飆秋名山下坡道嘅滋味，難怪出完一集又一集都重咁多人玩。
No.6
GhostSquad
體感槍Game，可買儲存卡Save進度，玩得愈耐，愈多隱藏要素出現，如新槍、新關卡。
機迷有嘢Say
場地提供：
金星機地
地址：尖沙嘴加拿芬廣場地下
太子遊戲機
地址：太子聯合廣場地下
