香港響應愛國，喺四月十七日搞咗一場反日示威。無論北京、上海、香港、深圳，反日示威對中日外交大局當然冇影響，只係一場發洩啫，中央稍一鬆手，讓學生、人民吐咗一口氣，立即收皮。李肇星講大局，胡錦濤講穩定社會，大家都明啦，愛國示威要配合中央指示，幾時出場，幾時拉箱，冚扮爛要配合中央政治需要。喺不適當時候講愛國、講反日，因住成為反動派。要愛國，就要聽教聽話！
香港反日之後，有乜得益呢？聽香港旅遊業議會主席何栢霆講，代價就即刻見到，五月初係日本黃金假期，大量日本人往外旅遊，但今年已有三成日本來港旅行團取消行程，令旅行社、酒店大感失望。日本人多數住靚酒店，消費能力高，三成旅客取消行程，梗係傷啦。香港其實太平無事，反日示威都斯文過人，但俾朝日電視一渲染，即刻有旅行團打退堂鼓，實在無可奈何。另一方面，何主席話香港去日本嘅旅行團，booking比去年同期都進展慢咗一啲，說明咗部份香港人都怕去日本，或者對日本突生惡感，所以唔去。
好彩啲遊學團生意冇少到，日益增加㖭。何主席話唔少香港中學自己組織學生去英國、瑞士、加拿大、中國呢四大熱門地點學習，一間中學總有四五十人參加，大家都係同學，唔怕生保。學校好精，組好團後，就交晒畀旅行社，等旅行社辦機票、交通，兼有旅遊賠償基金保證，學校派兩個老師隨行，加上一個旅行社導遊，一共三人帶隊，照顧周到。近年興起嘅遊學團就係去日本體驗電子遊戲創製過程，好多男仔鍾意去。到日本學打機遊戲，唔算不愛國，如果家長唔怕孩子對打機迷上加迷，大可讓佢試吓，一下唔覺意，佢返到嚟成為遊戲設計師，咁就長搵長有。