中華民國卸任副總統連戰入大陸，煲呔上台，新人事新作風，冇好似廢董咁儍，將馬英九當做拉登阿蓋達華人社區區長咁，列為危險人物，唔畀簽證入境，而係指使有「林D9」之稱嘅政制事務局局長林瑞麟，親自去到赤鱲角機場，歡迎連前副總統大駕光臨！
正當香港有識之士想燒炮仗，慶祝特區政府終於生性之際，點知說時遲那時快，呢頭醒扒，嗰頭即時賴尿，中華民國駐港地下領事、兼中華旅行社首領鮑正鋼，亦去到機場迎接自己人，就橫遭特區政府阻撓進入貴賓通道！
林D9噚日喺立會言語刻薄嘴臉惡睇，竟然出口傷人話：中華旅行社冇官方身份，所以不獲特區政府邀請，連戰在台灣總統大選之中，係陳水扁手下敗將，早已被轟下台，佢今時今日，虛偽嘅就叫佢一聲中華民國前副總統，坦率啲嘅，佢不過係一名普通「台胞」！中華人民共和國壽爺政權，從來唔承認中華民國官方地位，咁一名姓連嘅台胞過境，冇名冇份，林D9以政制事務局局長親自迎迓，咪正式承認咗中華民國，亦當咗連戰係克林頓咁，係堂堂卸任領導人？
林D9以政制事務局局長身份，畀足官方禮遇畀連戰，經已構成「製造兩個中國」嘅大罪！除非林D9佢以香港永久居民身份，貪得意遊覽新機場，唔覺意撞到連戰，覺得連戰係佢偶像，即時尖聲呼叫，撲埋去握手並索取簽名，咁又唔同！
咁林D9既已承認咗中華民國嘅官方地位，反為唔承認鮑正鋼嘅中華民國駐中華人民共和國香港特別行政區總領事嘅身份，係咪有少少九唔搭八兼騎呢？政制事務局局長早曾做過DHL，現時兼任開玻璃門嘅迎送生涯，點知迎送都送出個大頭佛，呢份三百萬年薪，係咪應該要開源節吓流？
林D9講嘢去到盡，第日香港人喺台灣身陷險境，特區政府要求人嗰陣，睇吓林D9要唔要下跪夾掌嘴？
林D9毫無外交風度，十足變性李香琴咁款，台灣二千三百萬人，人哋都有尊嚴，何物林D9「出口侮辱」台灣人，呢亭政務官義務協助台灣獨立，專同壽爺添飯添麵夾倒米，政制事務局長呢個位唔刪都冇用咯！
傳真︰2623-9278
電郵︰[email protected]