金管局升蔡耀君替代攞命陳陳德霖，冇乜意外。任志剛睇嚟可以安心向格林斯潘學習，有排都唔會退休。
今次人事變動，冚得好密，難怪攞命陳唔撈消息一出，成個中環都愕然。據聞呢單嘢其實醞釀咗一段時間，起因係證監要分拆主席同總裁職位，於是有人向唐英年推薦陳德霖，唐司長亦冇乜異議。攞命陳發覺自己雖然已盡量低調，一樣有人幫自己搵埋工，知道係時候要去「人生中間嘅休假」（Sabbatical），於是就去哈佛搵位，五月同金管局結束賓主關係。
以攞命陳嘅才幹，去哈佛鍍多層金，更錢途無限，但現今距離九月尚有四個月咁長，冇理由浪費呢個人才啫。如果八方係煲呔曾，就一定搵佢幫手搞競選工程，到時十個李永達都唔驚啦。
傳真︰2623-9278
電郵︰[email protected]