香港賽馬會近日相當黑仔，香港馬王「精英大師」十七連捷本應相當高興，點知無端端派帽派到人踩人，成為多份主要報章頭條新聞。𠵱隻黑鑊邊個孭？《南華早報》噚日用咗頗大篇幅質問，矛頭直指馬會公司發展事務執行總監麥建華。又彈佢事發後一直冇蒲頭，淨係派個唔知頭唔知路嘅下屬鄭國銘向外解話，總之縮得就縮。
八方唔多清楚馬會內部運作（因為透明度好低），但都聽聞家吓裏面立立亂，冷箭四圍飛。事緣好多人對行政總裁黃至剛個位好有興趣，當中有有能者也有無能者。於是乎，大事小事都可以演變成政治角力。除咗呢單派帽大笑話外，另一個一觸即發嘅炸彈係一班華人練馬師向馬會追討超時補水事件。據聞馬會內部打定輸數，但點樣收科就真係考起主席夏佳理。
傳真︰2623-9278
電郵︰[email protected]