現時西甲聯剩得巴塞隆拿同畢爾包兩支傳統球會唔「賣身」，將波衫心口位置賣畀贊助商宣傳，但巴塞隆拿好快有首個贊助商，而且重係中國背景。
巴塞隆拿會長拉樸達承認球會「破戒」來季波衫印有贊助商標誌，𠵱家正同兩間公司傾緊，一間係卡塔爾航空公司，一間係中國旅遊公司，據講旅遊公司背景係有中國政府支持，贊助巴塞目的係宣傳○八年北京奧運會，到一○年就宣傳廣州亞運會。如果成事，合約維持五年，每年贊助費達一千九百萬歐元（約一億九千一百萬港元），完成合約嘅贊助費就高達約九億六千萬港元，比車路士日前同南韓著名電子科技公司重要多成約二億港元，認真唔簡單。
拉樸達希望五月初球會可以攞聯賽冠軍，同埋完成今次贊助合約。得唔得，就要睇班球員生唔生性！
國際足協阿頭白禮達日前宣布，FIFA舊年有近一億六千幾萬法郎（約十億港元）盈利，佢重表示會發放三億三千萬法郎（約二十億港元）畀○六年世界盃三十二強球隊。我求大俠認為白禮達政治手段不嬲咁高，呢個時候公布國際足協業績，無非係想為連任鋪路嘅啫！
荷甲一哥燕豪芬嘅南韓國腳朴智星擒晚打AC時表現搶眼，意大利一個足球網站重畀佢全場最高分㖭，真係為亞洲人爭番口氣喇！而響賽前教練軒迪克要求佢續多三年約至○九年，點知朴智星表示淨係會留多兩年；正所謂人望高處，二十四歲嘅佢梗係眼望歐洲四大聯賽喇！
英格蘭名宿華度同埋曼聯兼英格蘭國腳後衞李奧費迪南喺前日分別喺唔同地方涉嫌傷人，前者重畀警方拉咗。我求大俠明白好多時都唔係啲球星搞事先，只不過係忍唔畀人撩先至還手，但所謂「食得鹹魚抵得渴」，做得球星就預咗會冇咗啲私隱，所以就算點唔高興都應該要忍。
布力般領隊曉士同西布朗領隊白賴仁笠臣都踢過曼聯，故有人諗曉士會畀條路細笠臣行；布力般算係咁，西布朗贏唔到只好怪把握唔到。西布朗打和一比一後雖攞得一分，但跟水晶宮同諾域治齊得三十分，搞到得番修咸頓一隊二字頭（二十八分）兼令對方畀博彩公司定為英超包尾大熱。
逢周一至周五見報