美股軟，港股無恙，恒指應酬式下跌19點。市底硬淨，每次跌落去，都值得買些少C輪，但唔適宜大貪，得些好意算數，密食當兩番。
恒指窩輪：4月期指收13870，高水31點，今日結算之後，炒恒指輪所睇嘅數據，就係5月期指。5月期指收13730，低水109點。下月大藍籌除息，大約相等於恒指90點，即係5月期指低水約20點。
炒恒指C輪，最好𠵱家先將溢價打大0.6%。炒恒指P輪，則將溢價減0.6%。恒指輪暫時炒上落，個市如果有得百幾點跌幅，低買恒指C輪，對象係3763同3938。個市如果有百幾點升幅，則低買P輪，對象係3884同4753。
中銀C輪4578：中銀（2388）回落0.10元，收14.65元。中銀個勢有型，吼C輪4578短炒。4578喺7月尾夠鐘，輪價6.2仙，溢價1.2%，槓桿率23.6倍（有效13.3倍），引伸波幅18.9%。
思捷C輪3760：思捷（330）畀芬佬愈捧愈高，博個勢未完，執少少C輪3760，8月初到期，輪價0.91元，溢價0.6%，槓桿率6.5倍（有效亦係）。
章盛