大市冇方向，小初完全諗唔到有乜嘢好炒。經紀陳話，就快五一黃金周，又到炒自由行概念，可以搵啲零售股炒吓，其中恒豐金業（870）剛完成供股，大股東成功增持，可以考慮。
經紀陳又話，近排零售股炒唔起，好大程度係因為地產市道好，舖位租金加得勁，影響經營成本上升，況且零售股已經炒咗兩年多，大部份股價炒得相當高。
相對於其他零售股，恒豐金表現更差，主要因為恒豐金搞供股，而且早排旗下「金至尊」個優質Q嘜被拎走，令股價大落後其他零售股。
恒豐金早排3供1，每股供1.01元，集資1.86億元，超額認購0.19倍，主要係大股東額外認購咗唔少，令持股量由30.01%增至39.04%。經紀陳話，既然大股東咁有信心，現價應該跟得過，而供股的新股今日開始可以買賣，估計呢兩日股價走勢會較為波動。
恒豐金昨微升0.95％，收1.06元，成交477萬元。
慕容小初