董伯伯退休晒閒情，上星期對住傳媒話啱啱煲完《漢武大帝》！點知無喇喇幫人賣廣告、做宣傳，now寬頻電視最受惠，剛剛在今個星期一播出第一集，唔使憂即刻大把人追！無諗到連女人街的大陸水貨黨都受惠，睇檔阿姐話：《漢武大帝》DVD出咗成個月，全靠董伯伯一句話，煲劇黨即刻落場掃，數天內銷情急升！連專入大陸音像產品的尚書房亦稱，部份分店《漢》劇上集已經斷市！
記者：邵超
攝影：林栢鈞
Models：Iris、阿舜
大陸一晚播兩次
5,000萬大製作《漢武大帝》，大陸由《大漢天子》、《大漢雄風》煲文火，至《漢武大帝》由一月播到二月卒之煲滾。中央電視台破天荒應觀眾要求，晚晚在晚間劇場重播，明明DirectorCut都係58集，都要監硬補多兩集花絮充夠六十集（電視台合約要求），接住新年再重播。
now寬頻電視 熱播中
38台美亞電視劇台
首播日期：4月25日
播出時段：周一至周五11:30pm（翌日重播）
梁文道now導讀：大陸網評更精采！
「原來董伯伯咁鍾意睇電視劇，應該早啲睇嘛！」梁文道笑笑口咁話。非常忙碌的梁文道，除受now寬頻電視之邀擔任《漢》劇導讀，原來佢睇劇更為研究中國社會的趨勢：「睇啲網友點評呢套劇，重精采過睇《漢武大帝》！」
網友熱話《漢》
1.網友話漢武帝係影射胡錦濤或中國新形勢，之前的雍正係影射朱鎔基。
2.帝王劇裏成日將皇帝打造成英雄，鼓吹帝王思想！
3.劇中司馬遷被閹後點解重有鬚？擺明嚴重失實！
大陸劇必In五理由
點解大陸劇咁紅？梁文道就分析話呢個係大勢所趨：
1.香港人𠵱家個個去大陸搵食，唔追人氣劇就Out硬。
2.大陸劇戲味夠，引發對歷史興趣。
3.製作認真，演員好，中年觀眾受落。
4.導演胡玫、演員張國立、張鐵林、陳道明、張寶國、斯琴高娃累積大量Fans。
5.被禁後解禁的歷史劇如《秦始皇》、《走向共和》都收視高企，大陸劇通常愈禁愈紅。
大陸劇入貨點
大陸劇熱賣榜
1.《漢武大帝》DVD（上、下） $360（a）
2.《中國式離婚》DVD $183（a）
3.《一江春水向東流》DVD $258（a）
4.《大染坊》DVD $185（a）
5.《白銀谷》DVD $500（b）
6.《鐵齒銅牙紀曉嵐III》 $600（b）
被禁《走向共和》足本炒過千
《漢武大帝》話題性夠，都係因為俾人鬧佢有違史實，不過它始終無機會打破03年《走向共和》的紀錄。當年中央電視台邊播邊刪，DVD足本一度禁售，近日所賣的全部係刪剪本，無咗結局中孫中山講「三民主義」的敏感畫面。據尚書房分店店長陳小姐稱，刪剪本賣$370，去年年中足本賣$700都多人訂，近一個月足本更炒到$1,100-$1,200。而近期《走》原班底炮製的《軍人機密》就值得推薦！
韓劇當道有得解
男女睇電視劇，可以「男愛大陸、女愛韓劇」來形容，大陸歷史劇多三十歲或以上男性追捧，女性則一面倒煲韓劇。點解？梁文道又有解釋：
解釋一：日劇係打後生仔和新中產市場，後生仔咁多娛樂，唔得閒煲碟！
解釋二：韓劇Hit中電視劇觀眾最核心的一群，就係師奶。韓劇中個個係貴公子，唔使做，師奶最迷佢哋的甜美笑容。
解釋三：男人驚人話老土，鍾意都唔敢認自己煲肥皂劇。相反睇歷史劇好似好有知識，咁啲男人咪有藉口睇囉，其實歷史劇不過係認真的肥皂劇。
解釋四：大陸劇同韓劇有啲似美國劇集，贏在多細節，好似蝦醬要用乜蝦、教埋你做。
爭奪「閔大人」
無綫播乜紅乜，《大長今》首次打入無綫星期一至五黃金檔，事前都部署咗好耐。眼看閔大人受落，無綫有意購下《春日》播映權，海外版權費為10萬美元，日本那邊廂多間電視台爭崩頭，成交價必貴。
（a）尚書房 27820503
（b）裕華國貨 23840084
（c）榆林書坊 23988482
（d）廣視影視 27899965
